सांगली : शहरातील कर्नाळ चौकी ते बायपास रोडवरील एका इमारतीत सुरू असलेला १३ पानी जुगारअड्डा पोलिसांनी उद्ध्वस्त केला. पोलिसांनी केलेल्या या कारवाईत २१ जणांना ताब्यात घेत रोख रकमेसह जुगार खेळण्यासाठी वापरण्यात येणारे साहित्य असा एक लाख ३२ हजार २५५ रुपयांचा मुद्देमाल जप्त करण्यात आला आहे.
याप्रकरणी जितेंद्र किसन पळसे (रा. जामवाडी, सांगली), अशोक साळुंखे (रा. चव्हाणवाडी, ता. वाळवा), रियाज काझी, फिरोज बागवान, इरफान बागवान (सर्व रा. शंभरफुटी रोड, सांगली), सुभाष माने (हरीपूर रोड, सांगली), अलताफ मुलाणी (गवळी गल्ली, सांगली), अनिल संकपाळ (रा. वानलेसवाडी), सूर्यप्रकाश धडके, समीर मुजावर (विजयनगर, सांगली), रमेश पवार (जामवाडी, सांगली), अबरार शेख (कर्नाळ रोड), दीपक डांबरे (चिंतामणीनगर, सांगली), मेहबूब सनदी (रा. ऐनापूर, ता. कागवाड), सरदार फकीर, महाबल मुंडे (रा. समडोळी), पिराजी ऐवळे (रा. बाज, ता. जत), दीपक शेरखाने, अनिल शेरखाने (दोघेही रा. इचलकरंजी), दीपक कांबळे (रा. राजारामपुरी, कोल्हापूर) यांच्यावर गुन्हा दाखल करण्यात आला आहे.
कर्नाळ रोडवर एका इमारतीमध्ये पथकाने छापा टाकला असता, २१ जण जुगार खेळताना आढळून आले. त्यांच्याकडून ६५ हजार ६५५ रुपयांच्या रोख रकमेसह मोबाइल, जुगार खेळण्यासाठी लागणारे साहित्य असा एक लाख ३२ हजार २५५ रुपयांचा माल जप्त करण्यात आला आहे. प्लास्टिक कॉइनद्वारे रकमा लावून हा जुगार खेळला जात होता.
शहर पोलीस ठाण्याचे निरीक्षक अजय सिंदकर यांच्या मार्गदर्शनाखाली सहायक पोलीस निरीक्षक खंडेराव रंजवे, गजानन कांबळे यांच्यासह पथकाने ही कारवाई केली. पोलीस कर्मचारी विक्रांत ईश्वर माने यांनी याबाबत फिर्याद दिली आहे.
चौकट
पोलीस अधीक्षक दीक्षित गेडाम यांनी जिल्ह्यात सुरू असलेल्या अवैध व्यवसायावर कडक कारवाईचे आदेश दिले आहेत. त्यानुसार पोलीस पथकाच्या वतीने जिल्हाभर कारवाई सुरूच आहे. गुरुवारी रात्री शहर पोलीस ठाण्याच्या पथकाला शहरातील कर्नाळ चौकी ते बायपास रोडवर एका वर्कशॉपजवळ असलेल्या इमारतीत जुगारअड्डा सुरू असल्याची माहिती मिळाली होती. त्यानुसार ही कारवाई करण्यात आली.