इस्लामपूर : आटपाडी तालुक्यातील २८ वर्षीय तरुणीवर तरुणाने इस्लामपूर येथे खोलीवर नेऊन बलात्कार केल्याची घटना शनिवारी मध्यरात्री घडली. ही तरुणी पोलीस भरतीसाठी येथील स्पर्धा परीक्षा मार्गदर्शन केंद्रात अभ्यास आणि सराव करत होती. पोलिसांनी तरुणास अटक केली आहे. त्याला सहा दिवस पोलीस कोठडी मिळाली. मनोज बाळासाहेब कांबळे (वय २८, रा. खरसुंडी, ता. आटपाडी) असे संशयिताचे नाव आहे.
पीडित तरुणी बँकेत कंत्राटी पद्धतीने नोकरी करत असताना, तिची मनोज कांबळे याच्याशी तोंडओळख झाली. दीड वर्षापूर्वी ती पोलीस भरतीच्या तयारीसाठी इस्लामपूर येथे आली. तीन मैत्रिणींसमवेत ती भाड्याने खोली घेऊन राहत आहे. चार महिन्यांपूर्वी मनोजने याच अकॅडमीत प्रवेश घेतला. पूर्वीच्या ओळखीमुळे दोघांचे फोनवर बोलणे, तसेच भेटणे होत होते. सप्टेंबर महिन्यात वडील आजारी पडल्यामुळे ती गावी गेली. त्यावेळी मनोजने तिला फोन करून, अभ्यासासाठी परत बोलावून मदतीचे आमिष दाखविले. दरम्यान, तिच्या वडिलांचे निधन झाले. नंतर ती पुन्हा इस्लामपूरला आली.
शनिवारी रात्री मनोजने तरुणीकडे मोपेड मागण्याचे निमित्त केले. ती तिच्या मैत्रिणीसह आष्टा नाक्यावर आल्यावर मनोजने तिचा मोबाईल काढून घेतला. मोबाईल घेण्यासाठी रात्री दहा वाजता त्याच्या खोलीवर बोलावले. नंतर मनोज तिच्या मैत्रिणींच्या मोबाईलवर फोन करून, तिला पाठवून देण्यास धमकावत होता. मध्यरात्रीनंतर पीडित तरुणी त्याच्या खोलीवर गेली असता, त्याने तिला खाेलीत घेऊन आतून कुलूप लावले. तिला धमकावत गळा आवळण्याचा प्रयत्न केला. तिच्यावर बलात्कार केला. या घटनेचे चित्रीकरण केले. हा प्रकार कोणाला सांगितल्यास बदनामी करण्याची धमकी दिली. घाबरलेल्या तरुणीने अकॅडमीच्या संचालकांना हा प्रकार सांगितला. रात्री उशिरा तिने पोलिसात फिर्याद दिली. सहायक पोलीस निरीक्षक गणेशप्रसाद भरते अधिक तपास करत आहेत.
फोटो :१४ मनोज कांबळे