शिराळा येथील पूल गल्ली रस्त्यावर असणाऱ्या ब्रिटिशकालीन पुलाची दुरवस्था झाली आहे. त्याची दुरुस्ती करावी अशी मागणी होत आहे.
विकास शहा
लोकमत न्यूज नेटवर्क
शिराळा : शिराळा येथील पूल गल्ली रस्त्यावर असणाऱ्या ब्रिटिशकालीन पुलाची दुरवस्था थांबवावीण तसेच नगरपंचायतीने दुरुस्ती करावी, संरक्षक कठडे बांधावेत तसेच पावसाळ्यापूर्वी ओढा स्वच्छ करावा अशी नागरिकांमधून मागणी केली जात आहे.
येथील पूल गल्लीतील गावास जोडणाऱ्या ब्रिटिशकालीन पुलाची दिवसेंदिवस दुरवस्था होत आहे. याचे संरक्षक लोखंडी कठडे तुटले आहेत. तर पुलाच्या दोन्हीही बाजूला पिंपळाची मोठी झाडे बांधकामात आली आहेत. यामुळे मूळ दगडी बांधकामास धोका उत्पन्न होत आहे. गावात प्रवेश करणारा हा सर्वात जुना पूल असूनही नगरपंचायतीचे या दुरवस्थेकडे अक्षम्य दुर्लक्ष होत आहे.
गावातील हा जाणारा मुख्य रस्ता आहे. वेळोवेळी रस्ते केल्याने भर पडून याची उंची वाढली आहे. यामुळे पुलाच्या रेलींगची उंची कमी झाली असून एखादी दुर्घटना होण्याची शक्यता आहे. या पुलावरून मोठी वर्दळ असते.
नुकतीच नगरपंचायतीने दक्षिण उत्तर अशी दत्त मंदिराजवळ संरक्षक भिंत बांधली आहे. या ओढ्यातील माती, दगडे हे सर्व या भिंतीच्या भरावासाठी वापरल्यास ओढा स्वच्छ होईल. आगामी पावसाळ्याच्या आत नगरपंचायतीने हे काम करणे गरजेचे आहे. हे काम झाल्यास ओढा स्वच्छ होईल व पूर आल्यावर पाणीही लगेच निचरा होऊन जाईल. त्यामुळे शिराळा नगरपंचायतीने या कामास प्राधान्य देऊन पुलाची व ओढ्याची दुरवस्था दूर करावी अशी मागणी होत आहे.