कडेगावातील बेपत्ता आई सतरा वर्षांनी मुलांना भेटली

तन्मय दाते

लोकमत न्यूज नेटवर्क

रत्नागिरी : पतीच्या निधनाचा धक्का सहन झाला नाही आणि महिलेने घर साेडले. पायाखाली येणारी वाट तुडवत ती चालत राहिली. चालत-चालत ही महिला सांगलीतील कडेगाव येथून थेट रत्नागिरीत पाेहाेचली. रस्त्याने फिरत असतानाच रत्नागिरीतील राजरत्न प्रतिष्ठानचे अध्यक्ष सचिन शिंदे यांनी या महिलेला पाहिले. सामाजिक बांधीलकी जाेपासणाऱ्या राजरत्न प्रतिष्ठानने या महिलेला रुग्णालयात दाखल केले आणि तेथून बरी हाेऊन तब्बल १७ वर्षांनंतर आपल्या कुटुंबात परतली.

काही दिवसांपूर्वी रत्नागिरी शहरातील टीआरपी येथे आरडाओरड करणारी महिला सचिन शिंदे यांनी पाहिली. तिच्याकडे चौकशी केली असता तिला काही आठवत नसल्याचे लक्षात आले. त्यांनी त्या महिलेला रुग्णालयात आणून तिची काेराेना चाचणी केली. ती पॉझिटिव्ह आली. त्यामुळे तिला रुग्णालयात दाखल करण्यात आले. तेथे उपचार करून ती बरी झाल्यानंतर तिला प्रादेशिक मनोरुग्णालयात आणले. हळूहळू तिच्यात सुधारणा झाल्यानंतर तिच्याशी संवाद साधण्यात आला.

या महिलेने सांगितले की, काही काळ ती रत्नागिरी तालुक्यातील जयगड व लांजा तालुक्यांतील देवधे याठिकाणी वास्तव्यास होती. मात्र, या महिलेला आपले नाव, गाव सांगता येत नव्हते. काही दिवसांनी या महिलेने सांगली जिल्ह्यातील कडेगाव येथे आपले घर असल्याचे सांगितले. त्यानंतर सचिन शिंदे यांनी रत्नागिरी शहर पोलिसांना याची माहिती दिली. पाेलीस स्थानकाचे अंमलदार लक्ष्मण कोकरे, महेश कुबडे, रूपेश भिसे व सांगली पोलीस स्थानकाचे अधिकारी जालिंदर जाधव यांनी या महिलेच्या नातेवाइकांचा शोध घेतला. महिलेची बहीण, भाचा व मुले रत्नागिरीत आली. ओळख पटविल्यानंतर त्या महिलेला त्यांच्या ताब्यात देण्यात आले. १७ वर्षांनंतर आपली व्यक्ती मिळाल्याचा आनंद या कुटुंबाच्या चेहऱ्यावर दिसत हाेता.

यावेळी मनोरुग्णालयाचे वैद्यकीय अधीक्षक डॉ. अमोद गडीकर, उपअधीक्षक डॉ. अमित लवेकर, मानसाेपचारतज्ज्ञ डॉ. संजय कलकुटगी, अश्विनी शिंदे व समाजसेवा अधीक्षक नितीन शिवदे व राजरत्न प्रतिष्ठानचे अध्यक्ष सचिन शिंदे, पोलीस अंमलदार लक्ष्मण कोकरे, महेश कुबडे, रूपेश भिसे व मनोरूग्णालयाचे कर्मचारी होते.

चौकट

आईला पाहताच दाटले अश्रू

कडेगाव येथील या महिलेला दोन मुले व एक मुलगी आहे. नातेवाईक भेटताच या महिलेने आपल्या बहिणीला व मुलीला लगेच ओळखले. काही वेळानंतर तिने आपल्या मुलालाही ओळखले. मुलाला ओळखताच त्याने तिला मिठीच मारली. आपल्या आईला समाेर पाहताच या मुलांच्या डाेळ्यांत आनंदाश्रू वाहत हाेते. आईच्या भेटीने आनंदलेल्या मुलांनी राजरत्न प्रतिष्ठान आणि पाेलिसांचे आभार मानले.