फाेटाे : १८ चेतन माने
मिरज : मिरजेतील टाकळी रस्त्यावर शिवम पार्क येथे चेतन आनंदा माने (वय ३२) याने दारूच्या नशेत पत्नी पूजा चेतन माने (वय २५) हिचा चाकूने पोटावर, मांडीवर, पाठीवर सपासप वार करून निर्घृण खून केला. याप्रकरणी शहर पोलिसांनी चेतन आनंदा माने यास ताब्यात घेतले आहे.
टेलरिंगचे काम करणाऱ्या चेतन माने याचा पाच वर्षांपूर्वी जयसिंगपूर येथील पूजासोबत विवाह झाला होता. दारूच्या व्यसनामुळे त्याचे पत्नीसोबत वारंवार भांडण हाेत होते. टाकळी रस्त्यावरील शिवम पार्क येथे आई, वडील, मुलगा, दोन मुली व पत्नी असे कुटुंबीय एकत्रित राहत होते. पत्नीसोबत भांडण व मारहाणीमुळे त्यास नातेवाइकांनी आठ दिवस घरातून बाहेर पाठविले होते.
चेतन याला दारूचे व्यसन असल्याने घराचा सर्व खर्च आई-वडील भंगार गोळा करून चालवत होते. पूर्वी टेलरिंग व्यवसाय करणारा चेतन पूर्णपणे व्यसनाच्या आहारी गेला होता. रविवारी ताे घरी आला तेव्हा आई-वडील घरी नव्हते. चेतन याने दारूच्या नशेत किरकोळ कारणावरून पत्नीसोबत भांडण काढले. रागाच्या भरात त्याने पत्नी पूजा हिच्या छातीवर, पोटावर, पाठीवर चाकूचे वार करून पलायन केले.
पूजा हिला गंभीर जखमी अवस्थेत मिरजेतील खासगी रुग्णालयात दाखल करण्यात आले. मात्र, उपचारापूर्वीच तिचा मृत्यू झाला. मृत पूजा हिच्या मुलांचा आक्रोश हृदय पिळवटून टाकणारा होता. सर्वात लहान मुलगी तर केवळ एक वर्षाची आहे. व्यसनाधीन चेतन याने पत्नी पूजाचा खून करून पूर्ण कुटुंब उद्ध्वस्त केले. पत्नीचा खून करून पळून गेलेल्या चेतन यास रात्री उशिरा पाेलिसांनी ताब्यात घेतले.