सांगली : चोरट्यांनी शहरातील कर्नाळ रोडवर असलेल्या रामनगर येथील बंद घराचा कडी-कोयंडा तोडून आत प्रवेश करत रोख ३० हजार रूपयांसह सोन्याच्या रिंगा असा ४५ हजारांचा ऐवज लंपास केला. तसेच हे घर बंद असतानाच लागलेल्या आगीत इतर साहित्याचेही नुकसान झाल्याची घटना घडली. याप्रकरणी प्रदीप बाबूराव सूर्यवंशी (रा. कर्नाळ रोड, रामनगर) यांनी शहर पोलिसात फिर्याद दिली आहे.
पोलिसांनी दिलेली माहिती अशी की, मंगळवार दि. ८ रोजी सायंकाळी पाचच्या सुमारास सूर्यवंशी बाहेर गेले होते. या कालावधित चोरट्यांनी त्यांच्या घराचा कडी-कोयंडा तोडून आत प्रवेश करत बेडरूममधील कपाटातील ३० हजारांची रोकड व सोन्याच्या रिंगा लांबविल्या. याच कालावधित घरात लागलेल्या आगीत महत्त्वाची कागदपत्रे व इतर साहित्याचेही नुकसान झाले. आग नेमकी चोरट्यांनी लावली, की शॉर्टसर्किटने लागली, याबाबत त्यांनाही नक्की माहिती नाही. बुधवारी ते घरी आल्यानंतर त्यांना चोरीचा प्रकार लक्षात आला. त्यानंतर त्यांनी शहर पोलिसात फिर्याद दिली आहे.