सांगली : जिल्ह्यातील ८० विकास कामांच्या निविदा ठेकेदाराने मॅनेज करून भरल्याचा प्रकार जिल्हा परिषद अतिरिक्त मुख्य कार्यकारी अधिकारी चंद्रकांत गुडेवार यांच्या लक्षात आल्यानंतर, त्यांनी ती कामे रद्द करून त्याची फेरनिविदा काढली. यावरून सोमवारी जिल्हा परिषद स्थायी समिती सभेत तीव्र पडसाद उमटले. अध्यक्षा प्राजक्ता कोरे यांचा आदेश झिडकारून गुडेवार फेरनिविदांच्या भूमिकेवर ठाम होते.
सोमवारी व्हिडिओ कॉन्फरन्सद्‌वारे जिल्हा परिषद स्थायी समितीची सभा घेण्यात आली. या बैठकीस सर्व पदाधिकारी आणि समितीचे सदस्य, खातेप्रमुख उपस्थित होते. सभेच्या सुरुवातीसच निविदा निघाल्यानंतर नियमानुसार ठेकेदारांनी निविदा भरल्या होत्या. तरीही बांधकाम विभाग आणि अतिरिक्त मुख्य कार्यकारी अधिकारी गुडेवार यांनी आटपाडी, शिराळा, तासगाव, पलूस येथील विकास कामांच्या निविदा का रद्द केल्या आहेत, असा सवाल काही सदस्य व पदाधिकाऱ्यांनी उपस्थित केला.
यावर गुडेवार यांनी, ८० निविदा ठरवून तीन ठेकेदारांनी कामाच्या अंदाजपत्रकाएवढ्याच दराने भरल्या आहेत. यामुळेच आटपाडी तालुक्यातील १६ आणि शिराळा तालुक्यातील दोन कामे रद्द करून दि. १९ एप्रिललाच फेरनिविदा प्रसिध्द केल्या आहेत. उर्वरित ६४ कामांच्या निविदाही सोमवार दि. २६ एप्रिल रोजी फेरनिविदा प्रसिध्द केल्या आहेत. नियमानुसार फेरनिविदा रद्द करून जुन्या निविदाप्रमाणे कामांना मंजुरी देता येणार नाही, असे स्पष्ट केले. यावरून पदाधिकारी, सदस्य आणि गुडेवार यांच्यात ऑनलाईन सभेतही जोरदार गोंधळ झाला. पण, अखेरपर्यंत गुडेवार ८० कामे रद्दच्या भूमिकेवर ठाम होते. यामुळे जिल्हा परिषदेत पदाधिकारी आणि गुडेवार वाद पुन्हा पेटण्याची शक्यता निर्माण झाली आहे.
चौकट
तासगावमध्ये निविदा मॅनेजची बैठक
जिल्ह्यातील विविध विकास कामांच्या निविदा प्रत्येक ठेकेदाराने मॅनेज करून भरण्याचा निर्णय तासगाव येथील ठेकेदारांच्या बैठकीत झाला. त्यानुसारच प्रत्येक ठेकेदाराने एका कामासाठी तीन निविदा विविध ठेकेदारांच्या नावावर भरण्याचा निर्णय केला खरा, पण ठेकेदारांचा तो डावही चंद्रकांत गुडेवारांनी उधळून लावला. ऐंशी कामे रद्द केल्यामुळे ठेकेदारांची चांगलीच पंचाईत झाली आहे.
चौकट
अध्यक्षा म्हणतात... जुन्या निविदानुसारच कामे
ऐंशी कामे रद्द केल्याबद्दल विचारले असता जिल्हा परिषद अध्यक्षा प्राजक्ता कोरे म्हणाल्या की, जादा दराने निविदा भरल्या, म्हणून निविदा रद्द करता येत नाहीत. यामुळे ६४ कामांच्या काढलेल्या फेरनिविदा रद्द करून जुन्या निविदानुसारच कामे होतील. याबाबत अधिकाऱ्यांना सूचना दिल्या आहेत.
चौकट
ब्रम्हदेव आला तरी फेरनिविदा रद्द नाही : गुडेवार
जिल्ह्यातील विकास कामांची ८० कामे मॅनेज करून भरल्याचे चौकशीत सिध्द झाले आहे. म्हणूनच ती कामे कायदेशीर प्रक्रिया करून रद्द केली आहेत. त्यानंतर दि. १९ एप्रिलला १६ कामांची निविदा प्रसिध्द झाली असून ६४ कामांची निविदा सोमवार दि. २६ एप्रिल रोजी प्रसिध्द झाली आहे. त्यामुळे ब्रम्हदेव आला तरीही फेरनिविदा रद्द होणार नाही, असे ठाम मत चंद्रकांत गुडेवार यांनी मांडले.