गुन्हा दाखल झालेल्यांमध्ये शेतमालक संभाजी सदाशिव चव्हाण, मनीषा संभाजी चव्हाण, संग्रामसिंह संभाजी चव्हाण, पृथ्वीराज संभाजी चव्हाण (अपाक आई मनीषा) (सर्व. रा. सिद्धेवाडी, ता. तासगाव), शिवशक्ती कन्स्ट्रक्शनचे मोहन कलाय्या जंगम (रा. नेमिनाथनगर, सांगली), प्रतीक मन्नत स्वामी, ईश्वर बामणे, महेश शिवाप्पा दुडणावर या आठ जणांचा समावेश आहे. याबाबतची फिर्याद सहायक पोलीस निरीक्षक नितीन केराम यांनी दिली आहे.
बस्तवडे येथील गट नं. ३७७ मधील जमीन सिद्धेवाडी येथील संभाजी चव्हाण यांनी स्वतःसह कुटुंबातील व्यक्तींच्या नावावर खरेदी केली होती. गेल्या काही महिन्यांपासून या डोंगराचे सपाटीकरण करून जमीन तयार करण्याचे काम सुरू आहे. या सपाटीकरणासाठी ब्रेकर, जेसीबी, डंपर, बोअर ब्लास्टिंगच्या यंत्राचा वापर करण्यात येत आहे. सुमारे ४० हून अधिक मजूर काम करीत आहेत. संभाजी चव्हाण यांनी या कामाचा ठेका शिवशक्ती कन्स्ट्रक्शनचे मोहन जंगम यांना दिला आहे.
बोअर घेत असताना गाडीचा कॉम्प्रेसर गरम झाल्याने या गाडीचा, तसेच डिझेल टाकी व गॅस सिलिंडरचा स्फोट झाला. स्फोटानंतर शेजारी उभ्या असणाऱ्या दुसऱ्याही गाडीचा स्फोट झाला. या स्फोटात प्रतीक स्वामी व ईश्वर बामणे या दोघांचा बळी गेला, तर महेश दुडणावार व उपेंद्र यादव हे दोघेजण जखमी झाले.
दरम्यान, याप्रकरणी पोलिसांनी स्फोटकांचे १३ नमुने ताब्यात घेतले आहेत. हे नमुने प्रयोगशाळेत पाठवून, नेमका स्फोट कशामुळे झाला, याचा तपास होणार आहे. शिवाय स्फोट झालेल्या क्षेत्राभोवती पोलीस बंदोबस्त ठेवण्यात आला आहे.
दोघा मृतांवरही गुन्हा दाखल
बस्तवडे येथील गट नं. ३७७ मध्ये बेकायदेशीररित्या जिलेटिन व अन्य स्फोटकांचा वापर करून डोंगराला सुरुंग लावल्याप्रकरणी तब्बल ८ जणांवर गुन्हा दाखल करण्यात आला आहे. यामध्ये दोघा मृतांचाही समावेश आहे. ईश्वर बामणे आणि प्रतीक स्वामी अशी या दुर्घटनेत ठार झालेल्यांची नावे आहेत. या दोघांवरही मृत्यूनंतर पोलिसांनी गुन्हा दाखल केला आहे.
आरोपी फरार
याप्रकरणी आठजणांवर गुन्हा दाखल झाला आहे. यातील दोन आरोपींचे निधन झाले आहे, तर इतर सहा आरोपी गुन्हा दाखल झाल्यानंतर फरार आहेत, अशी माहिती पोलिसांनी दिली.