अविनाश कोळी
सांगली : कोरोना काळात अनेक महिन्यांचा लॉकडाऊन व त्यामुळे घटलेली रस्त्यावरील वाहनांची संख्या अपघाताचा आलेख कमी करण्यास कारणीभूत ठरली आहे. २०१९ च्या तुलनेत २०२० मध्ये राज्यातील रस्ते अपघातांचे प्रमाण तब्बल २४ टक्क्यांनी घटले आहे. त्याचबरोबर राज्यात अपघाती मृत्युदराची सर्वाधिक घट सिंधूदुर्ग, औरंगाबाद शहर व पुणे शहरात नोंदली गेली आहे.
राज्यातील अपघाताची संख्या व त्यातील मृत्युदर कमी करण्यासाठी ‘इंटेलिजंट ट्रफिक मॅनेजमेंट सिस्टीम’ सुरू करण्यात आली आहे. त्यामुळे २०१८ ते २०२० या काळातील अपघातांचे प्रमाण काही प्रमाणात घटत होते; मात्र कोरोना काळात मोठा लॉकडाऊन लागल्याने राज्यातील अपघातांच्या प्रमाणात अभूतपूर्व घट नोंदली गेली. रस्त्यावरील वाहनांची संख्याच कमी झाल्याने हा चांगला परिणाम दिसत आहे. मात्र, अनलॉॅक काळात पुन्हा अपघात वाढल्याचे निरीक्षणही महामार्ग पोलिसांनी नोंदविली आहे.
चौकट -
चार जिल्ह्यात ३० टक्के अपघात
पुणे, सोलापूर, अहमदनगर व नाशिक या चार जिल्ह्यांतील अपघातांची संख्या राज्यातील एकूण अपघातात ३० टक्के इतकी आहे. दुसरीकडे २०२० मध्ये झालेल्या एकूण अपघाती मृत्यूमध्ये २६ टक्के म्हणजेच एकूण ३ हजार ३६ मृत्यू नाशिक ग्रामीण (८०१) , पुणे ग्रामीण (६९६), अहमदनगर (६४२), जळगाव (४७२), सोलापूर ग्रामीण (४२५) या भागात नोंदले गेले.
चौकट
राज्यातील अपघाताचे प्रमाण असे घटले
प्रकार २०१९ २०२० घट टक्के
एकूण अपघात ३२,९२५ २४९७१ २४
मृत्यू १२७८८ ११५६९ १०
गंभीर अपघात १२१९७ ९०९४ २५
किरकोळ दुखापत ५४७३ ३४३२ ३७
चौकट
या विभागात अपघाती मृत्युदरात सर्वाधिक घट
जिल्हा घट टक्के
सिंधूदुर्ग ३३
औरंगाबाद शहर ३२
पुणे शहर ३१
चौकट
अनलॉक काळात घात
लॉकडाऊनमध्ये अपघातांच्या प्रमाणात मोठी घट झालेली असताना अनलॉक काळात मात्र अपघातांचे प्रमाण अचानक वाढल्याचे दिसत आहे. डिसेंबर २०२० या एकाच महिन्यात राज्यात ३०७२ अपघात व १ हजार ४६२ मृत्यू नोंदले गेले. याउलट एप्रिल २०२० या महिन्यात सर्वांत कमी ५७२ अपघात व ३०३ मृत्यू नोंदले गेेले.