जत शहरातील अतिक्रमणे काढण्याची मागणी

माडग्याळ : जत शहरातून जाणाऱ्या विजापूर - गुहागर या राष्ट्रीय महामार्गावरील अतिक्रमणे काढण्याची मागणी शहरातील नागरिकांकडून होत आहे. विजापूर - गुहागर हा राष्ट्रीय महामार्ग जत शहरातून जातो. सध्या या महामार्गाची रूंदी ही अठरा ते वीस मीटर आहे. त्यातच शहरात रस्त्यामध्ये अर्धा मीटर दुभाजकही बसविण्यात येणार आहेत. या महामार्गाच्या दोन्ही बाजूला गटारे असून, या गटारांच्या बाजूला पेव्हर ब्लाॅक बसविण्याचे काम सुरू आहे. जत शहरातून जाणाऱ्या या महामार्गावर रस्त्याच्या दोन्ही बाजूला लोकांनी अतिक्रमण केले आहे. जत शहरातील वाहनधारक दुचाकी व चारचाकी वाहने रस्त्यावरच बाजूपट्टीवर लावत असल्याने आधीच अरूंद असलेला रस्ता अधिकच अरूंद होऊ लागला आहे. यासाठी राष्ट्रीय महामार्ग प्राधिकरणाने जत शहरातून जाणाऱ्या या महामार्गाच्या दोन्ही बाजूला लोखंडी बॅरिकेट्स उभी करून रस्त्यावर होत असलेल्या अतिक्रमणाला आळा घालावा, अशी मागणी होत आहे.