सांगली, मिरज परिसरात कडकडीत बंद

घटनेचा निषेध : बसेसवर दगडफेड; पोलीस मुख्यालयावर धडक, हिंदुत्ववादी संघटनेची निषेध रॅली

 सांगली : फेसबुकवर छत्रपती शिवाजी महाराज यांची आक्षेपार्ह छायाचित्रे प्रसिद्ध केल्याचे पडसाद आज (रविवार) सांगली परिसरातही उमटले. या घटनेच्या निषेधार्थ हिंदुत्ववादी संघटनांनी पुकारलेल्या सांगली ‘बंद’ला उत्स्फूर्त प्रतिसाद मिळाला. शहरात दोन व बुधगाव (ता. मिरज) येथे एक अशा तीन एसटी बसेसवर अज्ञातांनी दगडफेक केली. शहरासह, माधवनगर, बुधगाव येथे कडकडीत बंद पाळण्यात आला. दिवसभर तणाव होता. प्रत्येक चौकात पोलीस बंदोबस्त तैनात करण्यात आला होता. उपमहापौर प्रशांत मजलेकर-पाटील, नारायण कदम, शिवप्रतिष्ठानचे कार्यवाह नितीन चौगुले, हणमंत पवार, हरिदास पडळकर, शिवसेनेचे जिल्हाप्रमुख संदीप सुतार, अजिंक्य पाटील, अनिल शेटे, दिगंबर जाधव, नगरसेवक गौतम पवार, युवराज बावडेकर, शंभोराज काटकर यांच्यासह हिंदुत्ववादी संघटनेचे शेकडो कार्यकर्ते सकाळी मारुती चौकात जमा झाले. त्यांनी या घटनेचा निषेध व्यक्त करीत सांगली ‘बंद’ करण्याचा निर्णय घेतला. बंदसाठी त्यांनी शहरातून दुचाकी रॅली काढली. मारुती रस्ता, हरभट रस्ता, बालाजी चौक, कापड पेठ, गणपती पेठ, पटेल चौक, राजवाडा चौक, स्टेशन चौक, मुख्य बसस्थानक परिसर आदी मार्गावरून फिरुन त्यांनी ‘बंद’चे आवाहन केले. त्यानंतर रॅली पोलीस मुख्यालयावर गेली. शिष्टमंडळाच्यावतीने जिल्हा पोलीसप्रमुख दिलीप सावंत यांना निवेदन देण्यात आले. आमचा कायदा व सुव्यवस्थेवर विश्वास आहे. मात्र समाजात तेढ निर्माण करणार्‍या समाजकंटकावर राष्टÑद्रोहाचा गुन्हा दाखल करून त्याच्यावर कठोर कारवाई करावी, अशी मागणी केली. यावर सावंत यांनी याप्रकरणी शुक्रवारी रात्रीच गुन्हा दाखल करण्यात आला आहे. ज्या संशयिताने हे केले आहे, त्याला पुणे पोलिसांनी अटक केली आहे. दंगलसद्दश्य स्थिती निर्माण झाली, तर सर्वांचे फार मोठे नुकसान होते. यामुळे तुम्ही शांतता बाळगा. पोलिसांना सहकार्य करा, असे आवाहन केले. त्यानंतर पुन्हा कार्यकर्त्यांनी शहरातून रॅली काढून कडकडीच बंद आहे का नाही, याची पाहणी केली. दरम्यान, हिंदुत्ववादी संघटनांनी पुकारलेल्या बंदला शहरासह, माधवनगर, बुधगाव येथे उत्स्फूर्त प्रतिसाद मिळाला. दिवसभर कडकडीत बंद पाळण्यात आल्याने रस्त्यावर शुकशुकाट होता. कोणताही अनुचित प्रकार घडू नये, यासाठी प्रत्येक चौकात पोलीस बंदोबस्त तैनात करण्यात आला होता. सायंकाळनंतर काही मोजकीच दुकाने अर्धे शटर उघडून सुरू झाली होती. एसटी व शहरी बसच्या फेर्‍यांचे प्रमाणही कमी जाणवत होते. अनेक रिक्षा थांब्यांवर रिक्षा नव्हत्या. मिरज : सोशल मीडियातून थोरपुरुषांच्या विटंबनेच्या निषेधार्थ मिरजेत हिंदुत्ववादी संघटनांतर्फे बंद पाळण्यात आला. मिरज, मालगाव व लिंगनूर येथे अज्ञातांनी एसटीवर दगडफेक करून काचा फोडल्या. मिरजेत दोन ट्रकवर दगडफेक करण्यात आली. शिवसेना, भाजप, शिवप्रतिष्ठान, राष्ट्रीय स्वयंसेवक संघाच्या कार्यकर्त्यांनी श्रीकांत चौकात या प्रकाराचा निषेध केला. कार्यकर्त्यांनी बंदचे आवाहन केले. शहरात बंदला चांगला प्रतिसाद मिळाला. मार्केट, हायस्कूल रोड, शनिवार पेठ, सोमवार पेठ परिसरातील व्यवहार बंद होते. हिंदुत्ववादी कार्यकर्त्यांनी पोलीस ठाण्यावर मोर्चा काढून दोषींवर कारवाईच्या मागणीचे निवेदन दिले. दुपारी म्हैसाळ उड्डाण पुलावर (एमएच ४० बी. ८९३१) या जमखंडी-मिरज एसटीवर अज्ञातांनी दगडफेक करून काचा फोडल्या. लिंगनूर येथे (एमएच ४० वाय ५६६७) या मिरज-खटाव एसटीवर दगडफेक करून काचा फोडण्यात आल्या. मालगावात (एमएच १४-०७७) या एसटीवर अज्ञातांनी दगडफेक करुन काचा फोडल्या. मिरजेत किल्ला परिसरात व शिवाजी रस्त्यावर राहमतुल्लाह हॉटेलजवळ थांबलेल्या ट्रकवर अज्ञात तरुणांनी दगडफेक करुन पलायन केले. दगडफेकीच्या घटनेमुळे काही काळ तणावाचे वातावरण होते. संवेदनशील ठिकाणी मोठा पोलीस बंदोबस्त तैनात करण्यात आला होता. शनिवार पेठेत शाही चिनावली मशीदीतर्फे राष्ट्रपुरुषांच्या विटंबनेच्या निषेधाचा फलक लावण्यात आला होता. मशिदीच्या विश्वस्तांनी घटनेचा निषेध केला. (वार्ताहर)