सामान्य कुटुंबातील व्यक्ती अथक परिश्रम आणि कार्यनिष्ठेच्या जोरावर उच्चपदावर जाऊ शकते, याचे मूर्तीमंत उदाहरण म्हणजे क्रांतिअग्रणी डॉ. जी. डी. बापू लाड यांचे चिरंजीव अरुण (अण्णा) लाड आहेत. त्यांची नुकतीच महाविकास आघाडीकडून पुणे पदवीधर मतदारसंघातून ‘आमदार’पदी निवड झाली. त्यांना पुढील वाटचालीस शुभेच्छा..!
अरुण अण्णा लाड यांचा जन्म २९ ऑक्टोबर १९४७ रोजी कुंडल येथील क्रांतिकारकांच्या घरात झाला. साहजिकच त्यांना क्रांतीचे बाळकडू लहानपणापासूनच मिळाले. वडील क्रांतिअग्रणी डॉ. जी. डी. बापू लाड हे स्वातंत्र्यसंग्रामात कोणत्या ना कोणत्यातरी मोहिमेवर नेहमी असायचे. असे असताना या क्रांतिकारकांचे जिणे म्हणजे एक धगधगता अंगारच. असे हे सर्व अरुणअण्णा लाड यांनी लहानपणापासून जवळून पाहिले आणि अनुभवले देखील. क्रांतिसिंह नाना पाटील व क्रांतिअग्रणी जी. डी. बापू लाड यांचे सातारा प्रतिसरकारमधील सामाजिक उपक्रम व छोडो भारत आंदोलनातील क्रांतिकारक कार्याचा तसेच राजर्षी शाहू महाराज, डॉ. बाबासाहेब आंबेडकर, कर्मवीर भाऊराव पाटील आणि विशेषतः सत्यशोधक महात्मा जोतिराव फुले या सामाजिक सुधारकांच्या विचारांचा व कार्याचा प्रभाव अरुणअण्णांच्या जीवन कार्यावर साहजिकच पडत गेला.
आज पुणे पदवीधर मतदारसंघातून त्यांना मिळालेले यश म्हणजे क्रांतिअग्रणी डॉ. जी. डी. बापू लाड यांच्या विचारांचा विजयच म्हणावा लागेल. कारण गेली अनेक वर्षे सामाजिक कार्यात असणाऱ्या या कुटुंबाला न्याय मिळावा, अशी सामान्य जनतेतून तीव्र इच्छा होती. गतवेळी दोन नंबरचे मताधिक्य देऊन जनतेने आपले प्रेम दाखवून दिलेच होते. त्याच जोरावर यावेळी राष्ट्रवादी पक्षाचे सर्वेसर्वा खासदार शरद पवार यांनी अरुणअण्णा यांच्यावर विश्वास ठेवून महाविकास आघाडीकडून उमेदवारी दिली. ही उमेदवारी सार्थ ठरविण्यासाठी जणू कार्यकर्त्यांतूनच एकप्रकारचा उठाव झाला आणि सर्व कार्यकर्ते आपले सर्वकाही बाजूला ठेवून ‘आता नाही, तर कधीच नाही’ असे म्हणत पाचही जिल्ह्यात बेभानपणे कामाला लागले.
अरुणअण्णांचे चिरंजीव, जिल्हा परिषद सदस्य शरद लाड यांनी मायक्रो प्लॅनिंग केल्यामुळे विजय सोपा झाला. त्यांना राष्ट्रवादीचे प्रदेशाध्यक्ष जयंत पाटील यांचे मोलाचे सहकार्य लाभल्यामुळे अरुणअण्णा आमदार झाले.
चौकट
अरुणअण्णांचा शपथविधी
कुंडल आणि परिसराच्या डोळ्याचे पारणे फेडणारा सोहळा म्हणजे अरुणअण्णांची आमदारकीचा शपथविधी. हा सोहळा मुंबई येथे पार पडला. जी. डी .बापू, अरुणअण्णा आणि शरदभाऊ या तिन्ही पिढ्यातील कार्यकर्त्यांनी हा ऐतिहासिक क्षण अनुभवला.