कासेगाव : वाळवा तालुक्यातील एका गावातील १६ वर्षीय अल्पवयीन मुलीस पाठलाग व दमदाटी करून वेळोवेळी तिच्यावर शारीरिक अत्याचार केल्याची तक्रार कासेगाव पोलिसात दाखल झाली आहे. या अत्याचारातून पीडित मुलगी गर्भवती राहिली आहे. गणेश लक्ष्मण जाधव (वय २५, रा. तांबवे. ता. वाळवा) असे संशयिताचे नाव असून त्याला कासेगाव पोलिसांनी ताब्यात घेतले आहे.
वाळवा तालुक्यातील एका गावातील १६ वर्षीय अल्पवयीन मुलगी पालकांसोबत भाड्याच्या घरात वास्तव्यास आहे. संशयित गणेश जाधव हा त्याच्या मामाच्या घराचे बांधकाम सुरू असल्याने वारंवार त्या गावी येत होता. त्यातूनच त्या मुलीशी त्याची ओळख झाली. ओळखीचा फायदा घेत तो तिचा पाठलाग करू लागला. मॉर्निंग वॉकला ती गेली असता तो तिच्या पाठीमागे जात होता. हा प्रकार अनेक दिवस सुरू हाेता. पीडित मुलगी आपल्याला भाव देत नाही, हे लक्षात आल्यानंतर त्याने तिला धमकावण्यास सुरुवात केली. दमदाटी करून त्याने तिला भीती घातली. यास ती मुलगी बळी पडली. याचाच फायदा घेत त्याने तिच्यावर वेळोवेळी शारीरिक संबंध ठेवून अत्याचार केले. दोन दिवसांपूर्वी पीडित मुलीच्या पोटात दुखू लागल्याने तिच्या आईने तिला दवाखान्यात नेले. या वेळी ती चार महिन्यांची गर्भवती असल्याचे समजले. पालकांनी विश्वासात घेतले असता तिने संशयित गणेश जाधव याच्या अत्याचाराची माहिती दिली. कुटुंबीयांनी तत्काळ कासेगाव पोलीस ठाण्यात धाव घेत तक्रार दाखल केली. पोलिसांनी घटनेची दखल घेत संशियत गणेश जाधव यास ताब्यात घेतले.
दरम्यान, कासेगाव पोलिसांनी गणेश जाधव यास न्यायालयात उभे केले असता त्यास पाच दिवसांची पोलीस कोठडी सुनावली. या घटनेचा अधिक तपास उपविभागीय पोलीस ठाण्यात कृष्णात पिंगळे हे करत आहेत.