जिल्ह्यात १२ सहकारी आणि खासगी सहा असे १८ कारखाने आहेत. यापैकी सहकारी दहा आणि खासगी पाच अशा पंधरा साखर कारखान्यांचे गळीत हंगाम चालू झाले होते. जिल्ह्यात टेंभू, ताकारी, म्हैसाळ आणि आरफळ योजनांमुळे दुष्काळी भागामध्ये उसाचे क्षेत्र वाढले आहे. यामुळे जिल्ह्याचे उसाचे क्षेत्र ७७ लाख हेक्टरवरुन एक लाख हेक्टरपर्यंत गेले आहे. पंधरा कारखान्यांनी ६० लाख ४४ हजार ५९३ टन उसाचे गाळप करुन ६९ लाख ८३ हजार ९०९ क्विंटल साखर तयार केली आहे. जिल्ह्यात आणखी २५ ते ३० लाख टन ऊस शिवारात असून तो वेळेत गाळपासाठी जावा, यासाठी शेतकऱ्यांची धडपड सुरू आहे. राजारामबापू कारखान्याच्या जत युनिटने कार्यक्षेत्रातील उसाचे शंभर टक्के गाळप पूर्ण केले आहे. पहिलाच हंगाम असल्यामुळे एक लाख ५१ हजार टन उसाचे गाळप केले आहे. या कारखान्याचा गळीत हंगाम येत्या दोन दिवसात बंद होणार आहे. राजारामबापू कारखान्याच्या वाळवा तालुक्यातील तीन युनिटनी १३ लाख ६६ हजार टन उसाचे गाळप केले आहे. या कारखान्यांच्या कार्यक्षेत्रात सात लाख टन ऊस शिल्लक असून २५ मार्चपर्यंत त्या उसाचे गाळप पूर्ण होईल, असे त्यांच्या व्यवस्थापनाचे मत आहे. दि. ३१ मार्चअखेर कारखान्यांचे गळीत हंगाम बंद होणार आहेत.
वसंतदादा-दत्त इंडिया कारखान्याने ६ लाख ५८ हजार २२० टन उसाचे गाळप झाले असून ७ लाख ६६ हजार ८९० क्विंटल साखर तयार केली आहे. या कारखान्याने कार्यक्षेत्रातील शंभर टक्के उसाचे गाळप करण्याचा निर्णय घेतला आहे. क्रांती, हुतात्मा, विश्वास, सोनहिरा, उदगिरी शुगर, मोहनराव शिंदे या कारखान्यांसमोरही शिल्लक ऊस गाळपाचे मोठे आव्हान आहे. कारखाना प्रशासनाच्या माहितीनुसार एप्रिलच्या पहिल्या आठवड्यापर्यंत कारखान्यांचे गळीत हंगाम चालू राहणार आहेत.
चौकट
कारखाने गाळप टन साखर उत्पादन क्विंटल उतारा टक्के
वसंतदादा-दत्त इंडिया ६५८२२० ७६६८९० ११.६५
राजारामबापू साखराळे ६७२४१५ ७९९३०० ११.८९
विश्वास-चिखली ४८८४८० ५४६३०० ११.१८
हुतात्मा-वाळवा ४०८९४० ४६७८७५ ११.४४
राजारामबापू-वाटेगाव ३९४०४० ४७८१०० १२.१३
तासगाव-तुरची १०४८९० ११११५० १०.६०
राजारामबापू-डफळे १५१०४० १४७२७० ९.७५
साेनहिरा-वांगी ६५५०९५ ७६४४२० ११.६७
क्रांती-कुंडल ६५५८५० ७८४०६० ११.९५
राजारामबापू-सर्वोदय २९९८६० ३६६६६० १२.२३
मोहनराव शिंदे २५५००० २८८४०० ११.३१
निनाईदेवी-दालमिया २७६८९० ३३८२७५ १२.२२
यशवंत-नागेवाडी १०८८९२ ११३२९० १०.४०
उदगिरी शुगर ४२०१६० ४७९६९० ११.४२
श्री श्री रवीशंकर-राजेवाडी ४९४८२१ ५३२२२९ १०.७६
एकूण ६०४४५९३ ६९८३९०९ ११.५५