देवरुख : येथील २६ वर्षीय तरुणीने राहत्या घरात गळफास घेत आत्महत्या केल्याची घटना, मंगळवारी दुपारी १२ वाजण्याच्या सुमारास उघडकीस आली. तिलोत्तमा सदानंद मांजरेकर असे तिचे नाव असून, तिने आत्महत्या का केली, हे समजू शकलेले नाही.
देवरूख पोलीस स्थानकातून मिळालेल्या माहितीनुसार, तिलोत्तमा मांजरेकर (२६, रा.देवरुख काॅलेजच्या पाठीमागे) ही एकटीच घरात राहत होती. तिने राहत्या घराच्या खोलीत नायलॉनच्या दोरीच्या साहाय्याने गळफास घेत आपली जीवनयात्रा संपविली. ती राहत असलेल्या घराच्या अवतीभवती कुजकट वास येत होता. त्याचा मागोवा घेतल्यानंतर, मंगळवारी दुपारी ती गळफास घेतलेल्या स्थितीत शेजारच्या मंडळींना दिसून आली. या घटनेची खबर स्वप्निल कांगणे यांनी देवरूख पोलीस ठाण्यात दिली.
देवरुख पोलिसांनी घटनास्थळी जाऊन पंचनामा केला. मृतदेहाचे विच्छेदन संगमेश्वर ग्रामीण रुग्णालयात करण्यात आले. शवविच्छेदन झाल्यानंतर मृतदेह नातेवाइकांच्या ताब्यात देण्यात आला. या घटनेचा अधिक तपास पोलीस देवरुख पोलीस स्थानकातील उपनिरीक्षक विद्या पाटील करीत आहेत. तिच्या आत्महत्येचे कारण मात्र उलगडलेले नाही.