लांजा : लांजा तालुक्यातील वेरवली - डोळसवाडी येथील ३४ वर्षीय तरुणाने घरातील हॉलमध्ये गळफास घेऊन आत्महत्या केल्याची घटना मंगळवारी सायंकाळी ५ वाजता घडली. मात्र, आत्महत्या करण्याचे कारण समजू शकले नाही.वेरवली बुद्रुक डोळसवाडी येथे शांताराम शेणवी व त्यांचा मुलगा सिध्देश शांताराम शेणवी (३४) हे दोघेजण राहतात. सिध्देश यांच्या आईचे ३ आॅक्टोबर रोजी वर्षश्राध्द असल्याने मुंबई येथून सिध्देश याचा भाऊ व बहीणही गावाला वेरवली येथे आली आहेत. त्यांचा क्वारंटाईन कालावधी दोन दिवसांपूर्वी संपला होता.
मंगळवारी सायंकाळी सिध्देश याचा भाऊ संदेश व बहीण शेजारी गेली होती. वडील शांताराम हे आपल्या खोलीत झोपले असताना सिध्देश याने अंगणामध्ये कपडे वाळत टाकण्यासाठी बांधण्यात आलेली नायलॉनची दोरी कापून आणली. घरातील हॉलमध्ये असलेल्या वाशाला गळफास घेऊन आत्महत्या केली.सिध्देश यांचे वडील शांताराम यांना जाग आल्यानंतर ते हॉलमध्ये आले असता सिध्देशने गळफास घेतल्याचे दिसले. त्यांना मोठा मानसिक धक्का बसला. त्यांनी आरडाओरडा केल्यानंतर शेजारी गेलेले भाऊ, बहीण तसेच वाडीतील ग्रामस्थांनी धाव घेतली. तोपर्यंत वेळ निघून गेली होती. याची खबर संदेशने लांजा पोलिसांना दिली.
उपविभागीय पोलीस अधिकारी निवास साळोखे, लांजा पोलीस स्थानकाचे सहाय्यक पोलीस निरीक्षक संजय चौधर आपल्या पोलीस कर्मचाऱ्यांसमवेत घटनास्थळी दाखल झाले. अधिक तपास हेडकॉन्स्टेबल श्रीकांत जाधव करीत आहेत.