पैशाच्या लालसेपोटी पुतणीचा बळी

नराधम चुलत्याला अटक

 आरवली : संगमेश्वर तालुक्यातील कडवई उजगांवकरवाडी येथील एका नराधम चुलत्याने कानातील रिंग्जसाठी आपल्या पुतणीचाच जीव घेतला. अवघ्या सहा वर्षाच्या या मुलीच्या कानातील रिंग्ज त्याने ओरबाडून काढून तिला विहीरीत ढकलून दिल्याची संतापजनक घटना कडवई येथे मंगळवारी दुपारी घडली असून या घटनेने कडवई परिसरात खळबळ उडाली आहे. मंगळवारी सकाळी १०.३० आपल्या दुचाकीवरून अमोल प्रविण उजगावकर (२३) हा दोन महिलांसह आपली पुतणी रुणाली रविंद्र उजगावकर (६) हिला घेवून बाहेर निघाला. त्यावेळी त्याचे लक्ष मात्र त्या चिमुकलीच्या कानात असणार्‍या सोन्याच्या रिंग्जवर होते़ या रिंग्जमधून आपली पैशाची गरज भागवणे हा एकच विचार त्याच्या मनात होता. त्याने दुचाकीवरील दोन्ही महिलांना अर्धवटच सोडले आणि रुणालीला घेवून थेट कडवई मोहल्ल्यातील मशिदीच्या मागे असणार्‍या देवशेत तळी येथील विहिरीजवळ पोहोचला आणि त्या चिमुकलीच्या कानातील रिंग्ज हिसकावून घेवून तिला विहीरीत ढकलूून दिले. या घटनेनंतर या रिंग्ज त्याने कडवईतील सोनाराला दीड हजार रुपयांना विकल्या. ही घटना साधारणत: दुपारी १२.३० वाजता घडली़ आरोपी अमोल याचा विवाह ठरला असून या घटनेनंतर तो काही घडलेच नाही, अशा अविर्भावात आपली भावी पत्नी राहत असलेल्या तांबेवाडी येथील तिच्या घरी पोहोचला़ दरम्यान, विहीरीत पडल्याने रुपाली हिचा तडफडून मृत्यू झाला. मुलीला यायला उशिर झाला म्हणून घरच्यांनी तिची शोधशोध सुरु केली. अखेर संध्याकाळी ४.०० वाजता वाडीतील ग्रामस्थांनी संगमेश्वर पोलिस स्थानकांत येवून तक्रार दाखल केली़ पोलिस निरीक्षक एम़ आऱ चिखले आणि सहाय्यक पोलिस निरिक्षक रविराज फडणीस यांनी सहकार्‍यांसह शोध सुरू केला. रुणाली ही अमोलबरोबर गेल्याची माहिती मिळाल्याने पोलिसांनी तांबेडी येथून अमोलला ताब्यात घेतले. त्याच्याकडे विचारणा केली असता सुरूवातीला अमोल याने उडवाउडवीची उत्तरे दिली. मात्र पोलिसी खाक्या दाखवतांच अमोलने आपण रुणालीला विहिरीत ढकलून दिल्याचे कबूल केले. पोलिस आणि ग्रामस्थांच्या अथक प्रयत्नांनंतर ज्याठिकाणी तिला ढकलून देण्यात आले, तेथे जाऊन रुणालीचे शव रात्री ९च्या सुमारास विहिरीतून बाहेर काढण्यात आले. दरम्यान अमोल यास याप्रकरणी पोलिसांनी भादंवि कलम ३०२ अन्वये गुन्हा दाखल करून अटक केली आहे. रुणालीेचे शव कडवई प्राथमिक आरोग्य केंद्राच्या शवविच्छेदन खोलीत वीजेची व्यवस्था नसल्याने संगमेश्वर ग्रामिण रुग्णालयात नेण्यात आले व बुधवारी सकाळी कडवई उजगांवकरवाडी येथे आणून त्यावर अंत्यसंस्कार करण्यात आले. यापुढील तपास पोलिस निरिक्षक एम़ आऱ चिखले यांच्या मार्गदर्शनाखाली चालू आहे. (वार्ताहर)