रत्नागिरी : रत्नागिरी जिल्हा माध्यमिक अध्यापक संघा(टीडीएक)चे जिल्हा अध्यक्ष, महाराष्ट्र पत्रकार संघाचे राज्य उपाध्यक्ष सागर पाटील यांची महाराष्ट्र माध्यमिक शिक्षक संघाच्या (फेडरेशन) कोकण विभाग प्रसिद्धी प्रमुखपदी नुकतीच निवड करण्यात आली आहे. फेडरेशनचे अध्यक्ष ज्ञानेश्वर कानडे, सचिव शालिग्राम भिरुड यांनी सदर निवडीचे पत्र सागर पाटील यांना दिले आहे.
ज्ञानेश्वर कानडे यांनी सांगितले की, सागर पाटील यांच्या अनुभवाचा, ज्ञानाचा चळवळीस अधिक उपयोग व्हावा, यासाठी त्यांची कोकण विभागीय प्रसिद्धी प्रमुखपदी निवड करण्यात आली आहे. सागर पाटील यांनी जिल्हाभरातील अनेक शिक्षकांचे प्रश्न मार्गी लावले आहेत. सतत कार्यरत असलेल्या सागर पाटील यांनी अनेक प्रश्नांना वाचा फोडली आहे. अध्यापक संघाचे रत्नागिरी जिल्हाध्यक्ष म्हणून करीत असलेल्या कामाची दखल घेत राज्य संघटनेने सागर पाटील यांच्यावर ही महत्त्वपूर्ण जबाबदारी दिली आहे.