मंडणगड : तालुक्यातील काेराेना रुग्णांची वाढती संख्या लक्षात घेऊन तालुक्यातील भिंगळाेली ग्रामीण रुग्णालय आता काेराेना रुग्णालय म्हणून सुरू करण्यात आले आहे. हे रुग्णालय गुरुवार दि. २२ एप्रिल २०२१ पासून उपचारासाठी सुरू करण्यात आले आहे.
मंडणगडातील कोरोना रुग्णांना उपचाराकरिता खेड, दापोली, रत्नागिरी या ठिकाणी जावे लागत होते; मात्र सध्या जिल्ह्यात सर्वत्र रुग्ण वाढत असल्याने रुग्णालयेही फुल्ल झाली आहेत. त्यामुळे मंडणगड तालुक्यातही काेरोना रुग्णालय सुरू करण्यात आले आहे. तालुक्यातील भिंगळोली येथील ग्रामीण रुग्णालय येथे हे रुग्णालय सुरू करण्यात आले आहे. यामुळे आता तालुक्यातील कोविड रुग्णांवर तालुक्यामध्येच उपचार होणार आहेत. याआधी तालुक्यात केवळ कोविड केअर सेंटर सुरू आहे. याठिकाणी रुग्णांना तात्पुरत्या स्वरूपाचे ऑक्सिजन देण्याची व्यवस्था होती; मात्र अधिक ऑक्सिजनची गरज भासल्यास त्यांना पुढील उपचारासाठी खेड, दापोली अथवा रत्नागिरी येथे पाठवावे लागत होते. आता मात्र तालुक्यातील रुग्णांवर तालुक्यातच उपचार होणार आहेत. या रुग्णालयात २५ बेडची व्यवस्था करण्यात आली असून, याठिकाणी १० जंबो ऑक्सिजन सिलिंडरची व्यवस्था करण्यात आली आहे. तसेच आणखी १० ऑक्सिजन सिलिंडरची मागणी केली आहे. याठिकाणी आय.सी.यू व व्हेंटिलेटरची सुविधा सुरू करण्यात आलेली नाही. पहिल्याच दिवशी याठिकाणी ५ रुग्ण दाखल झाले असून, त्यापैकी दोन रुग्णांना ऑक्सिजन पुरवठा करण्यात येत आहे.
................................
अन्य तपासणी कुंबळे, पणदेरी, देव्हारे येथे हाेणार
ग्रामीण रुग्णालय येथे कोरोना रुग्णालय सुरू केल्यामुळे याठिकाणी होणारी दैनंदिन रुग्ण तपासणी व उपचार आता कुंबळे, पणदेरी व देव्हारे याठिकाणी होणार आहे. त्यामुळे यापुढे काेरोना स्थिती बदलेपर्यंत अन्य सर्व आजारांवरील उपचारासाठी हे रुग्णालय बंद राहणार आहे. कोरोना रुग्णालयाबरोबरच याठिकाणी आता वैद्यकीय अधिकारी, परिचारिका, त्याचबरोबर चतुर्थ वर्गातील कर्मचाऱ्यांची आवश्यकता वाढली आहे.