दापोली : जिल्ह्यात पुन्हा लाॅकडाऊन होणार असल्याच्या अफवेमुळे ग्रामीण भागात संभ्रमावस्था वाढली आहे. कोरोनाचे संकट पुन्हा वाढत आहे. परंतु जिल्हाधिकारी यांच्याकडून अद्याप कोणत्याही नव्या सूचना आलेल्या नाहीत, अशा प्रकारचे संदेश विविध माध्यमांवर फिरत असल्यामुळे संभ्रमावस्था वाढली आहे.
पाइपलाइन जोडली
दापोली : दापोली तालुक्यातील आंजर्लेला पाणीपुरवठा करणारी पाइपलाइन अज्ञात व्यक्तीने काही दिवसांपूर्वी तोडली होती. या घटनेचा पंचनामा करून पुन्हा ही पाइपलाइन जोडण्यात आल्याचे उपसरपंच महेश महाडिक यांनी सांगितले. आंजर्लेला खुटीचे पाणी या ठिकाणावरून पाणीपुरवठा केला जातो.
ब्लड लाइन संघटनेची स्थापना
चिपळूण : कोरोनासारख्या गंभीर परिस्थितीमध्ये रक्ताचा तुटवडा मोठ्या प्रमाणात भासत आहे. त्यामुळे ही गरज ओळखून येथील सामाजिक कार्यकर्ते अमोल टाकळे व सहकारी मित्रांनी फक्त सामाजिक असणाऱ्या २०० पेक्षा जास्त रक्तदात्यांना ब्लड लाइन संघटनेच्या माध्यमातून एकत्रित केले आहे. या संघटनेच्या माध्यमातून गरजू रुग्णांसाठी रक्त, प्लेट्स रक्तपेढीच्या माध्यमातून तत्परतेने देण्याच्या संकल्प आहे.
सापाला जीवदान
दापोली : दापोली तालुक्यातील आंजर्ले येथील भालचंद्र कोकणे यांनी गांडूळखत युनिटला संरक्षण म्हणून मच्छीमार जाळी लावली आहे. या जाळीत अडकलेल्या सापाला आंजर्ले येथील सर्पमित्र मणित बाईत व वैभव बाईत यांनी सोडवून जीवदान दिले. या जाळीत धामण जातीचा साप अडकला होता.
पुस्तकांचा आधार
रत्नागिरी : कोविड रुग्ण उपचारासाठी रुग्णालयात दाखल होतात; मात्र रुग्णालयातील वातावरण व अन्य रुग्णांची परिस्थिती पाहून कोविड रुग्णांच्या मनात नकारात्मक विचार येतात. या नकारात्मक विचारांवर मात करण्यासाठी पुस्तकांची साथ महत्त्वाची असून, कोविड रुग्णांना रुग्णालयातच पुस्तके उपलब्ध करून देण्याचा उपक्रम शहरातील मोरेश्वर जोशी व तसेच कै. कुसुमताई अभ्यंकर सार्वजनिक ग्रंथालयाचे अध्यक्ष विश्वनाथ बापट, श्रीकृष्ण साबणे व हेल्पिंग हॅण्डच्या माध्यमातून सुरू केला.