राजन साळवींचा विक्रमी मताधिक्याने विजय

शिवसेनेचे विद्यमान आमदार राजन साळवी यांनी ३९,०६२ एवढ्या मताधिक्याने एकतर्फी विजयश्री खेचून आणली.

लांजा : राजापूर - लांजा विधानसभा मतदारसंघात चौरंगी लढत होऊन कुणालाही मोठे मताधिक्य मिळणार नसल्याचा अंदाज वर्तवण्यात येत असतानाच सर्वांचे अंदाज चुकवून मताधिक्य मिळवत शिवसेनेचे विद्यमान आमदार राजन साळवी यांनी ३९,०६२ एवढ्या मताधिक्याने एकतर्फी विजयश्री खेचून आणली. राजापूर - लांजा विधानसभा मतदारसंघ हा शिवसेनेचा बालेकिल्ला असल्याचे येणाऱ्या प्रत्येक निवडणुकीमधून दाखवून दिले आहे. मात्र, युतीमध्ये फुट व आघाडीमध्ये बिघाडी झाल्याने शिवसेना, भाजप, काँग्रेस, राष्ट्रवादी काँग्रेस असे चारही पक्ष स्वबळावर लढणार असल्याने मतदानाचे विभाजन होऊन कुणालाही मोठे मताधिक्य मिळणार नाही, असा अंदाज वर्तवण्यात येत होता. त्यामध्ये शिवसेनेचे विद्यमान आमदार राजन साळवी विरुद्ध काँग्रेसचे उमेदवार राजेंद्र ऊर्फ राजन देसाई यांच्यात जोरदार लढत होणार असल्याने अनेक राजकीय ज्येष्ठ मंडळींकडून भाकीत केले जात होते. भाजपचे उमेदवार संजय यादव व राष्ट्रवादी काँग्रेसचे अजित यशवंतराव हे २५ ते ३० हजार इतकी मते मिळवतील, असाही अंदाज व्यक्त केला जात होता. मात्र, हा अंदाज फोल ठरला.रविवारी सकाळी ८ वाजता कडेकोट बंदोबस्तात लांजा तहसील कार्यालयात मतमोजणीला सुरुवात करण्यात आली. मतमोजणीच्या पहिल्या फेरीत शिवसेनेचे विद्यमान आमदार राजन साळवी यांनी ३२५२ इतके मताधिक्य मिळवले. यावेळी राष्ट्रवादी काँग्रेस, भाजपचे उमेदवार ९ हजारांची मते मिळवू शकले नाहीत. तसेच काँग्रेसचे राजन देसाई यांना ११८२ मते मिळवण्यात यश आले. आमदार राजन साळवी यांनी प्रत्येक फेरीमध्ये मताधिक्य घेत ४३ हजार १०१ मते मळवत २५ हजार ३०२ मताधिक्य मिळवले. यावेळी काँग्रेसचे राजन देसाई यांना १७ हजार ७१६ मते मिळाली. तसेच राष्ट्रवादी काँग्रेसचे अजित यशवंतराव यांना ७ हजार ८०७ मते मिळाली. साळवी हे प्रत्येक फेरीमध्ये मताधिक्य मिळवत गेले. ते अखेरच्या २४व्या फेरीपर्यंत त्यांचे मताधिक्य वाढत गेले. लांजा-राजापूर साखरपा विधानसभा मतदारंघामध्ये एकूण २ लाख ३४ हजार ६९ मतदार आहेत. त्यापैकी १ लाख ४२ हजार ५६६ मतदारांनी आपला मतदानाचा अधिकार बजावला होता. यामध्ये शिवसेनेचे उमेदवार राजन साळवी यांना एकूण ७६ हजार २६६ मते मिळाली. (प्रतिनिधी)