मंडणगड तालुक्यातील पणदेरी धरण फुटण्याची शक्यता असल्याची माहिती जिल्हा पाेलीस नियंत्रण विभागाला मिळताच पाेलीस विभाग ‘अलर्ट’ झाला आहे. पाेलीस अधीक्षक डॉ. मोहितकुमार गर्ग मदतीच्या आवश्यक साहित्यासह
आपल्या १०० पोलीस अंमलदारांना सोबत घेऊन तत्काळ घटनास्थळी पोहाेचले आणि
स्थानिकांना धीर दिला.
जिल्हा
पोलीस नियंत्रण कक्षाला पणदेरी धरण फुटण्याची शक्यता असल्याची
माहिती प्राप्त झाली. ही माहिती मिळताच जिल्हा पाेलीस अधीक्षक यांनी आपल्या पाेलीस अंमलदारांना सूचना केल्या. गळतीमुळे कोणतीही जीवितहानी होऊ नये म्हणून डाॅ. गर्ग यांनी सहकाऱ्यांसह पणदेरीला धाव घेतली. पोलीस मुख्यालय, रत्नागिरी येथून जादा कुमक म्हणून १०० पोलीस अंमलदार रवाना झाले. तसेच
आपत्कालीन साधन सामग्री, फायबर बोट, लाईफ जॅकेट, रिंग बोये, रोप, सर्च
लाईट, स्ट्रेचर, प्रथमोपचार पेटी इत्यादी साहित्य तत्काळ पोहाेचविण्यात
आले.
तसेच प्रत्यक्ष घटनास्थळी जाऊन नागरिकांना धरण फुटून कोणतीही जीवितहानी होऊ
नये म्हणून पी. ए. सिस्टीम व मेगाफोनव्दारे स्थलांतरीत होण्याबाबत आवाहन
करण्यात आले. स्थलांतरित होण्याकरिता निर्माण होणाऱ्या अडचणी समजून घेऊन
जास्तीत जास्त लोकांना स्थलांतरित होण्याबाबत सांगण्यात आले. बौध्दवाडी, रोहिदासवाडी, कोंडगाव इत्यादी वाडीतील लोकांना महसूल व पोलीस
प्रशासनाच्या मदतीने सुरक्षितस्थळी स्थलांतर करण्याकरिता मदत करण्यात आली.
घटनास्थळी पाेलीस अधीक्षक डॉ. मोहितकुमार गर्ग यांच्यासह खेडचे उपविभागीय पोलीस अधिकारी
काशिद, मंडणगड व बाणकोट पोलीस स्थानकाच्या पाेलीस निरीक्षकांनी भेट देऊन नागरिकांना धीर दिला. यावेळी त्यांच्या अडीअडचणी व लागणारी साधन सामग्री याबाबत माहिती घेतली. जिल्हा पोलीस दल आपल्या मदतीसाठी सदैव तत्पर असून, इतर शासकीय आस्थापनांशी
समन्वय ठेवून आवश्यक ती मदत करण्याची ग्वाही पाेलीस अधीक्षक डाॅ. माेहितकुमार गर्ग यांनी रहिवाशांना दिली.
-------------------------------
मंडणगड तालुक्यातील पणदेरी येथील धरणाला गळती लागून धरण फुटण्याचा धाेका निर्माण हाेताच पाेलीस अधीक्षक डाॅ. माेहितकुमार गर्ग घटनास्थळी दाखल झाले. त्यांनी धरण परिसराची पाहणी करून नागरिकांशी संवाद साधला.