चिपळूण गटविकास अधिकाऱ्यांकडे कैफियत

कौंढरताम्हाणेतील घरकुलाचा प्रश्न : काँग्रेस ग्रामसेविकेविरोधात आक्रमक

चिपळूण : तालुक्यातील कौंढरताम्हाणे या विकासाभिमुख गावातील ग्रामसेविकेमुळे विकासाला खीळ बसली आहे. या ग्रामसेविकेची तत्काळ उचलबांगडी करावी अन्यथा ग्रामपंचायतीला टाळे मारु व आंदोलन करू, असा इशारा सरपंच चंदन भोबस्कर व काँग्रेसचे प्रवक्ते प्रभाकर जाधव यांनी दिला. काँग्रेसचे तालुकाध्यक्ष संदीप सावंत व इतर पदाधिकाऱ्यांनी घरकुलाचा विषय लावून धरला. काँग्रेसचे तालुकाध्यक्ष सावंत यांच्या नेतृत्त्वाखाली आज (मंगळवारी) दुपारी गटविकास अधिकारी शुभांगी पाटील यांना शिष्टमंडळ भेटले. काँग्रेसच्या शिष्टमंडळाने गटविकास अधिकाऱ्यांचे स्वागत केले. त्यानंतर कौंढरताम्हाणे येथील ग्रामसेविकेच्या कारभाराचा पाढा वाचला. ग्रामसेविका विकास कामात सहकार्य करीत नसल्याने गावचा विकास खुंटला आहे, अशी कैफियत सरपंच भोबस्कर यांच्यासह उपस्थित ग्रामस्थांनी व काँग्रेसच्या पदाधिकाऱ्यांनी मांडली. या ग्रामसेविकेविरोधात गावातील ग्रामस्थांच्याही तक्रारी आहेत. त्यांच्याकडून सहकार्य मिळत नसल्याने पेच निर्माण होत असल्याचे भोबस्कर यांनी सांगितले.याबाबत गेली चार वर्षे सातत्याने पाठपुरावा करुनही प्रशासन ढिम्म आहे. विस्तार अधिकारी ग्रामसेवकांना पाठिशी घालत आहेत, असे प्रकार खपवून घेतले जाणार नाहीत, असा इशारा यावेळी देण्यात आला. गटविकास अधिकारी पाटील यांनी याप्रकरणी आपण गांभिर्याने दखल घेऊ, विस्तार अधिकाऱ्यांच्या कामाचा आढावा आम्ही घेत आहोत. त्यामध्ये सुधारणा केली जाईल, असे आश्वासन त्यांनी दिले. तर ग्रामसेविकेबाबत १ आॅक्टोबरपर्यंत योग्य निर्णय होईल, असे त्यांनी सुचित केले. शासनाच्या इंदिरा आवास घरकुल योजनेबाबत नवीन धोरणाचा फटका अनेक मोठ्या गावांना बसत आहे. इंदिरा आवासच्या प्रतीक्षा यादीतील लाभार्थींनी आपली गरज भागवण्यासाठी कर्ज काढून घरकुल बांधले आहेत, असे यावेळी काँग्रेस पदाधिकाऱ्यांनी गटविकास अधिकाऱ्यांच्या लक्षात आणून दिले.ज्यांचे काम पूर्ण आहे, अशा लाभार्थींची खातरजमा करुन त्यांना तत्काळ निधी उपलब्ध करुन द्या. शिवाय प्रतीक्षा यादीवरील लाभार्थींना जास्तीत जास्त संधी द्यावी, अशी मागणी उपस्थित पदाधिकाऱ्यांनी केली. यावर विचार न झाल्यास ग्रामपंचायतीला टाळे ठोकण्याचा इशारा देण्यात आला.याबाबत वरिष्ठांशी चर्चा करुन निर्णय घेऊ, असे गटविकास अधिकारी पाटील यांनी सांगितले. प्रशासकीय बाबींचा अभ्यास करुन वरिष्ठांच्या मार्गदर्शनानुसार लाभार्थींना लाभ देता येईल का, हे पाहिले जाईल. त्यासाठी आपण स्वत: पाठपुरावा करू, असे आश्वासन पाटील यांनी दिले. यावेळी येथील गटाचे जिल्हा परिषदेचे माजी सदस्य नंदकुमार थरवळ, सुधीर दाभोळकर, पवार, राजा यादव, प्रभाकर जाधव, गुहागर विधानसभा क्षेत्राध्यक्ष गुलजार कुरवले, सरपंच चंदन भोबस्कर, प्रफुल्ल पिसे व कौंढर ताम्हाणेचे ग्रामपंचायत सदस्य व ग्रामस्थ उपस्थित होते. (प्रतिनिधी)