लोकमत न्यूज नेटवर्क
रत्नागिरी : जिल्ह्यात सर्वत्र शिमगोत्सवाची धूम सुरू झाली असली, तरी कोरोनाचे सावट मात्र सर्वत्र आहे. कोरोना रुग्ण वाढत असल्याने प्रशासनाने उत्सव साधेपणाने साजरा करण्याचे आवाहन केले आहे. त्यामुळे रविवार, दि. २८ रोजी मुख्य होळी तोडली जाणार असून सोमवार दि. २९ रोजी सर्वत्र मोठा होम केला जाणार आहे. ग्रामीण पातळीवरही शासनाच्या नियमांचे पालन करूनच उत्सव साजरा करण्याचे निश्चित करण्यात आले आहे.
खेडोपाडी, शहरांत शेवरीचे झाड वाजतगाजत आणून फाकपंचमीला होळी उभी करण्यात आली होती. त्यानंतर १० दिवस पेटविण्यात येते. होळी पौर्णिमेला मात्र मोठा होम केला जाणार आहे. जिल्ह्यात ११६७ सार्वजनिक तर ३०७९ खासगी होळ्या करण्यात आल्या आहेत. शिमगोत्सवात ग्रामदेवतेच्या पालख्या रूपे लावून सजविण्यात येतात. काही पालख्या फाकपंचमीनंतर तर काही होळी पौर्णिमेला ग्रामप्रदक्षिणेला बाहेर पडतात. काही रंगपंचमीनंतर देवळात परततात, तर काही गावांतून चैत्रीपर्यंत पालखी उत्सव साजरा केला जातो. त्याप्रमाणे जिल्ह्यातील १३७७ ग्रामदेवतांच्या पालख्या ग्रामप्रदक्षिणेसाठी बाहेर पडल्या आहेत.
ग्रामदेवतेच्या दर्शनाला मंदिरात जावे लागते, मात्र शिमगोत्सवात ग्रामदेवतेची पालखी घरोघरी येते. त्यामुळे भाविक पालखीसाठी गावी आवर्जून येत असतात. मात्र, कोरोनामुळे यावर्षी पालख्या घरोघरी येणार नाहीत. प्रशासनाने निर्बंध घातले असल्यामुळे सहाणेवरच पालखी थांबणार आहे. पालखी नाचविण्यासही मनाई आदेश आहे. त्यामुळे सामाजिक अंतर ठेवून पालखीचे दर्शन घेता येणार आहे.
पालखीबरोबर मोजक्याच व्यक्तींची उपस्थिती राहणार असून होळी व रंगपंचमीनिमित्त रंग खेळण्यासही मनाई करण्यात आली आहे. कोरोना रुग्णवाढ सुरू असल्याने सण साजरा करण्यासाठी शासनाने नियमावली जारी केली आहे, जेणेकरून गर्दी होऊ नये किंवा संसर्ग बळावू नये, यासाठी विशेष खबरदारी घेण्यात येत आहे. जिल्ह्यातील सर्वच गावांनी शासनाच्या नियमावलींचे पालन करून शिमगोत्सव साजरा करण्याचे निश्चित केले आहे.
श्री भैरीचा शिमगोत्सव
बारा वाड्यांचे ग्रामदैवत श्री देव भैरी बुवांचा शिमगोत्सव रविवार, दि. २८ पासून सुरू होत आहे. कोरोनामुळे पालखीची ग्रामप्रदक्षिणा रथातून होणार आहे. पालखी नाचविण्याचा कार्यक्रम होणार नाही. सोमवारी रात्री धूळवड होणार असून दि.२ एप्रिल रोजी रात्री १२ वाजता पालखी श्री भैरी मंदिरात परतणार असून धुपारती व गा-हाणे होऊन शिमगोत्सवाची सांगता होणार आहे.
जिल्ह्यात उभ्या करण्यात आलेल्या खासगी व सार्वजनिक होळ्यांची तसेच पालख्यांची संख्या पुढीलप्रमाणे :
पोलीस स्थानक सार्वजनिक खासगी पालखी
शहर १५ १०७ १५
ग्रामीण ७२ १३० ६८
गुहागर ४६ २३० ४६
जयगड ४५ १६६ २०
पूर्णगड ३० ६५ ५५
राजापूर १०४ १४२ ६१
नाटे १२ ४२ २३
लांजा ९६ ११४ ९८
देवरूख १२० ११२ ७९
संगमेश्वर ७९ १६८ ७९
चिपळूण ९५ १७० ७२
सावर्डे ४३ २५० ४०
अलोरे ३१ ३४५ ३१
खेड २२० ३६० ५७१
दापोली १५० ३७५ --
दाभोळ २४ ५७ १८
मंडणगड ७५ १६५ ५५
बाणकोट ३० ७३ १८
एकूण ११६७ ३०७९ १३७७