रत्नागिरी :
शहरानजीकच्या मिरजोळे एमआयडीसी येथील साईभूमी नगर येथील एका इमारतीत शुक्रवारी (२१ ऑक्टाेबर) सकाळी ९.३० वाजण्याचा सुमाराला गळफास घेतलेल्या अवस्थेत तरुण आढळल्याने खळबळ उडाली आहे. साहिल विनायक मोरे (२४, रा. अलावा मिऱ्या, रत्नागिरी) असे या तरुणाचे नाव आहे. याबाबत शहर पोलीस स्थानकात आकस्मिक मृत्यूची नोंद करण्यात आली आहे. शवविच्छेदन अहवाल प्राप्त झाल्यानंतरच त्याच्या मृत्यूचे नेमके कारण समजू शकणार असल्याचे पोलिसांनी सांगितले.
आईला शुक्रवारी सकाळी जेटीवर सोडल्यानंतर तो आपल्या प्रेयसीला भेटण्यासाठी साईभूमी नगर येथील प्रेयसीच्या मैत्रिणीच्या फ्लॅटवर गेला होता. काही वेळाने साहिलच्या प्रेयसीने मी कामावर जात असून, तू फ्लॅटचा दरवाजा बंद करुन खाली ये असे सांगितले. परंतु, १५ ते २० मिनिटे झाल्यानंतरही ताे खाली न आल्याने तिने साहिलला फोन केला. परंतु, त्याने फोन न उचलल्याने तिने फ्लॅटवर जाऊन पाहिले. तर ताे गळ्याला मोठा बेल्ट लावून सिलिंग फॅनला गळफास घेतलेल्या अवस्थेत दिसला.
त्याच्या प्रेयसीने कात्रीने तो बेल्ट कापून साहिलला शेजाऱ्यांच्या मदतीने जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी साहिलला तपासून मृत घोषित केले.