दापोली, दि. १ : दापोली शहरातील व जालगाव येथील श्वानदंशाची प्रकरणे ताजी असताना आता आपटी व नारगोली परिसरात एका पिसाळलेल्या श्वानाने हैदोस घातला आहे. त्यांने एकाच दिवशी तब्बल ५ जणांना चावा घेतला आहे. यातील तीन रूग्णांना शहरातील उपजिल्हा रूग्णालयात दाखल करण्यात आले आहे.
तालुक्यातील आपटी येथील वंदना गायकवाड (५५), टाळसूरे येथील प्रकाश चौगले (४०) व नारगोली येथील श्रीजा बालगुडे (९) व अन्य दोघांना एकाच पिसाळलेल्या श्वानाने चावे घेतले आहेत. यातील वंदना गायकवाड यांची प्रकृती चिंंताजनक झाल्याने त्यांना येथून जिल्हा रूग्णालयात हलवण्याचा सल्ला वैद्यकीय अधिकाऱ्यांनी दिला आहे. तसेच श्रीजा बालगुडे व प्रकाश चौगुले यांच्यावर येथील उपजिल्हा रूग्णालयात उपचार सुरू आहेत. श्रीजा ही एका झऱ्यावर बाटलीने पाणी भरत असताना तिला अचानकपणे पाण्यातून येऊन श्वानाने चावे घेतल्याचे तिच्या आईने सांगितले. (प्रतिनिधी)