पोलादपूर : एकीकडे कोरोनाचा वाढता प्रादुर्भाव तर दुसरीकडे पाणी टंचाईग्रस्त गावांची वाढती संख्या, या दुहेरी संकटाचा सामना पोलादपूरवासीयांना करावा लागत आहे. पोलादपूर तालुक्यातील ३१ गावे ६६ वाड्यांसाठी तालुक्यात सात टँकरने पाणीपुरवठा सुरू करण्यात आल्याची माहिती पंचायत समिती पाणीपुरवठा विभागामार्फत देण्यात आली. पोलादपूर तालुक्यात १ एप्रिल ते ३० जून २०२० या कालावधीत पाणीटंचाई कृती आराखड्यामध्ये ४६ गावे आणि १२३ वाड्यांचा समावेश टंचाई निवारण आराखड्यात करण्यात आला होता. यापैकी सद्य:स्थितीत ३१ गावे ६६ वाड्यांना पाणीपुरवठा करण्यात येत आहे.
तालुक्यातील प्रलंबित धरणाचे काम मार्गी लागले नसल्याने व पाण्याबाबत कोणीच जागृत नसल्याने वर्षानुवर्षे पाणीटंचाईला सामोरे जावे लागत आहे. वास्तविक, गावागावांतील कूपनलिका नळपाणी योजना यांची देखभाल करून मृत पाणीसाठा जीवित करणे गरजेचे आहे. पावसाळ्यातील पाणी अडविल्यास व ते जमिनीत मुरवल्यास भूगर्भात पाणी साचून उन्हाळ्याच्या दिवसांत ते पाणी कूपनलिकांद्वारे उपलब्ध होईल. मात्र, याकडे दुर्लक्ष होत असल्याने तसेच नियोजनाअभावी लाखो रुपये टंचाईवर खर्ची होत आहेत.
या टंचाईग्रस्त ७० गावे-वाड्यांमध्ये केवनाळे, चांभारगणी बु. व खुर्द, किनेश्वर, निवे, ताह्माणे, आड, दाभिल, सडेकोंड, सडे, बोरघर, वाकण, नानेघोळ या गावांसह केवनाळे आंबेमाची, बोरघर बौद्धवाडी, महादेवाचा मुरा, वडघर - दिवाळवाडी, सनसपेढा, पवारवाडी, उलालवाडी, सणसवाडी, फौजदारवाडी तर कामथे येथील जांभडी, फौजदारवाडी, शेंबिवाडी, आदिवासीवाडी, देऊळवाडी कीनेश्वर, मोरसाडे गावातील आदी वाड्यांना सात टँकरद्वारे पाणीपुरवठा सुरू करण्यात आला असल्याची माहिती पंचायत समिती पाणीपुरवठा विभागामार्फत देण्यात आली.
३१ गावे ६६ वाड्या अशा एकूण ९७ गावे-वाड्यांना सात टँकरद्वारे पाणीपुरवठा सुरू आहे. टंचाईग्रस्त कोणतेही गाव, वाडी पाण्यापासून वंचित राहू नये यासाठी तालुका प्रशासनाने सर्व उपाययोजना केली आहे. सद्य:स्थितीत नवीन मागणी नाही. १ गाव व ९ वाड्यांना येत्या दोन दिवसांत पाणीपुरवठा करण्यात येणार असल्याचे पोलादपूर पंचायत समिती, पाणीपुरवठा विभागाकडूनजी. ई. कांबळे यांनी सांगितले.