अलिबाग : मांडवा येथून मुंबईकडे निघालेली रो रो बोट बंदरात धडकून अपघात झाल्याची घटना दुपारी एक वाजण्याच्या सुमारास घडली. सुदैवाने यात कोणतीही दुर्घटना घडली नाही. रो रो इंजिनमध्ये बिघाड आल्याने हा अपघात घडला आहे. यामध्ये बोट लावणाऱ्या धक्याचे नुकसान झाले आहे. रो रो ही सध्या बंदरात धक्याला लावून ठेवली आहे.
मांडवा बंदरातून दुपारी एक वाजण्याच्या सुमारास रो रो बोट प्रवाशांना घेऊन गेटवे कडे निघाली होती. त्याचवेळी रो रो मधील एका इंजिन मध्ये बिघाड झाल्याने चालकाचे नियंत्रण सुटून बोट जलवाहतूक करणाऱ्या दुसऱ्या धक्यावर जाऊन धडकली. सुदैवाने कोणतीही जलवाहतूक धक्याला नव्हती. अन्यथा मोठा बाका प्रसंग निर्माण झाला असता. या अपघातात दुसऱ्या धक्याला असलेल्या रेलिंगचे नुकसान झाले आहे.
अपघातानंतर रो रो बोट ही पुन्हा धक्याला लावण्यात आली असली तरी प्रवाशांना नाहक त्रास सहन करावा लागला आहे.