मधुकर ठाकूर
उरण : चिरनेर गावातील स्थानिक तरुणांवर परप्रांतीय भाजी विक्रेत्यांनी जीवघेणा हल्ला केल्याची घटना शनिवारी रात्रीच्या सुमारास घडली आहे. या घटनेसंदर्भात उरण पोलिस ठाण्यात तक्रार दाखल करण्यात आली आहे. चिरनेर येथील सुभाष ठाकूर हे कुटुंब आपल्या कुटुंबाच्या उदरनिर्वाहासाठी गेली अनेक वर्षे भाजीपाला विक्रीचा व्यवसाय करतात .त्यांच्या या व्यवसायाला त्याची पत्नी सविता ठाकूर, सुजित व रिक्षाचालक सुशांत ठाकूर ही दोन मुले सहकार्य करत आहेत.स्थानिकांच्या भाजीपाल्याच्या व्यवसायाच्या बाजूला परप्रांतीयही भाजीचा व्यवसाय करत आहेत.
सुशांत हा नेहमी प्रमाणे आपल्या आई वडिलांना मदत म्हणून भाजीचे दुकान बंद करण्यासाठी गेला असता मेहताब अली अबुल कलाम अली उर्फ संजय हा परप्रांतीय भाजी विक्रेता इसम सुशांतच्या अंगावर थुंकला. या घटनेचा जाब सुशांतने सदर परप्रांतीय भाजी विक्रेता इसमाला विचारला असता दोघांमध्ये शाब्दिक बाचाबाची झाली.मेहताब अली अबुल कलाम अली उर्फ संजय यांनी सदर घटनेची खबर आपल्या सहकाऱ्यांना दिली.त्याच दरम्यान सुशांत हा स्थानिक तरुण आपला दुकान बंद करण्याच्या नादात बेसावध असताना मेहताब अली अबुल कलाम अली उर्फ संजय व त्यांचे सहकारी यांनी अवजड भाजी ठेवण्याचा ट्रे सुशांतच्या डोक्यात जीवे ठार मारण्याच्या उद्देशाने घातला व त्याला लाथाबुक्क्यांनी मारझोड केली.
आपल्या भावाला परप्रांतीय इसम मारत असल्याची बाब सुजित यांच्या निदर्शनास येताच तो भावाला सोडविण्यासाठी पुढे सरसावला असता मेहताब अली अबुल कलाम अली उर्फ संजय व त्यांच्या सहकाऱ्यांनी सुजित ठाकूर यांच्या डोक्यात भाजी ठेवण्याचा ट्रे घालण्याचा प्रयत्न केला. या झटापटीत सुशांत व सुजित यांच्या डोक्याला,हाताला गंभीर स्वरूपाची दुखापत झाली आहे. सदर घटनेची माहिती चिरनेर गावातील ग्रामस्थांना मिळताच ग्रामस्थांनी घटनास्थळी धाव घेतली. मात्र तोपर्यंत परप्रांतीय भाजी विक्रेत्यांनी त्या ठिकाणावरुन पोबारा केला होता.या घटने संदर्भात उरण पोलिस ठाण्यात तक्रार दाखल करण्यात आली आहे.