पुणे, दि. 28 - पुण्यात भरधाव ट्रकने दिलेल्या धडकेत महिलेचा जागीच मृत्यू झाला आहे. चांदणी चौकातून कोथरुडच्या दिशेने जाणा-या रस्त्यावर हा अपघात झाला असून अपघातात दोन शाळकरी विद्यार्थिनीदेखील गंभीर जखमी झाल्या आहेत. पोलिसांनी आरोपी ड्रायव्हरला ताब्यात घेतलं आहे.
शुक्रवारी सकाळी नऊ वाजण्याच्या सुमारास हा अपघात झाला आहे. ट्रकचालक चौकातून कोथरुडच्या दिशेने जात असताना अचानक ट्रकवरील नियंत्रण सुटलं आणि त्याने रस्त्यावरुन जाणा-या महिलेला धडक दिली. यावेळी तिथे दोन विद्यार्थिनीही उपस्थित होत्या. पूजा चव्हाण यांना बसलेली धडक इतकी जबर होती की त्यांचा जागीच मृत्यू झाला. तर निकीता नवले आणि शितल राठोड या विद्यार्थिनी गंभीर जखमी झाल्या आहेत. दोघींवर रुग्णालयात उपचार सुरु आहेत.
या रस्त्यावर तीव्र उतार असल्यामुळे नेहमीच छोटे-मोठे अपघात होत असल्याची माहिती आहे. अपघातात काही गाड्यांचंही नुकसान झालं आहे.