लोकमत न्यूज नेटवर्क
नारायणगाव : मतदारांना आकर्षित करण्यासाठी १५०० रुपये किमतीचे ५ लिटर तेलाचे कँन्ड वाटप करताना वडगाव येथील दोन उमेदवारांवर नारायणगाव पोलिसांनी गुन्हा दाखल करण्यात आला आहे, अशी माहिती नारायणगावचे सहाय्यक पोलीस निरीक्षक दत्तात्रय गुंड यांनी दिली.
वाणेवाडी भोरवाडी, वडगाव येथील वार्ड क्रमांक १ चे उमेदवार कुंडलिक रामभाऊ सोनवणे आणि साहिल अनिल भोर (रा. भोरवाडी, वडगाव ता. जुन्नर) अशी गुन्हा दाखल करण्यात आलेल्या दोन उमेदवारांची नावे आहेत. याबाबतची फिर्याद पोलीस कॉन्स्टेबल योगेश दामोदर गारगोटे यांनी दिली आहे. याबाबत गुंड यांनी दिलेल्या माहिती नुसार, निवडणुकीच्या पार्श्वभूमीवर वडगाव भोरवाडी गावचे हद्दीत निमगावसावा रोडवर काही उमेदवार वस्तूचे वाटप करत आहेत अशी माहिती पोलिसांना मिळाली. पोलिसांचे खास पथक खाजगी वाहनाने त्या ठिकाणी गेले, असता महाविकास आघाडी पॅनलचे उमेदवार कुंडलिक सोनवणे आणि साहिल भोर हे वडगाव ग्रामपंचायत निवडणूकित लोकप्रिय उमेदवार यांना मतदान करावे म्हणून देविदास दगडू भोर यांना १५०० रुपये किमतीचे ०५ लिटर मापाचे तेलाचे कँन वाटताला आढळले. पोलिसांनी वरील दोघांना रंगेहात पडकत गुन्हा दाखल केला आहे.
सहाय्यक पोलीस निरीक्षक दत्तात्रय गुंड यांच्या मार्गदर्शनाखाली पुढील तपास पोलीस नाईक भीमराव लोंढे हे करीत आहे.