लोकमत न्यूज नेटवर्क
पुणे : मध्यरात्री प्रतिबंधित गुटखा वाहतूक करणा-या दोघांना विमानतळ पोलिसांनी अटक केली आहे. त्यांच्याकडून १४ लाख २५ हजार ६०० रुपयांचा गुटखा आणि पिकअप असा एकूण २० लाख ६०० रुपयांचा मुद्देमाल जप्त करण्यात आला आहे.
धनंजय राजेंद्र गावडे (वय २८, रा. शिवाजीनगर) आणि सुरेश बच्चा मुखिया (वय ३३, रा. मारूंजी, हिंजवडी, मूळ रा. बिहार) अशी या दोघांची नावे आहेत. त्यांच्यासह चौघांविरोधात विमानतळ पोलीस ठाण्यात गुन्हा दाखल करण्यात आला आहे.
नगर रोडवरून एका पिकअप व्हॅनमधून गुटखा वाहतूक केली जाणार असल्याची माहिती पोलीस नाईक सुशील जाधव यांना मिळाली होती. त्यानुसार तपास पथकाने सापळा रचला. गुटखा वाहतूक करणारी पिकअप वेगाने निघून गेली. पोलिसांनी त्यांचा खराडी बायपास चौक ते आठ मुळा रोड खडकी या दरम्यान पाठलाग करून पिकअप पकडला. त्यातील १४ लाख २५ हजार ६०० रुपयांचा गुटखा व पिकअप असा २० लाख ६०० रुपयांचा माल जप्त केला आहे.
आरोपींनी आणखी गुटख्याचा साठा करून ठेवला आहे का? याबाबत तपास करणे, माल कोठून आणला यासह त्यांच्या इतर साथीदारांचा सहभाग आहे का? याचा तपास करण्यासाठी त्यांना पाच दिवसांची पोलीस कोठडी द्यावी, अशी मागणी सहायक सरकारी वकिलांनी केली. त्यानुसार दोघांना न्यायालयाने २१ ऑगस्टपर्यंत पोलीस कोठडी सुनावली आहे.