पुणे : अल्पवयीन १३ वर्षांच्या मुलीला फूस लावून गणपती दाखविण्याचा बहाणा करून पळवून नेऊन तिच्याशी लगट करण्याचा प्रयत्न करून विनयभंग केला. तसेच तिला अश्लील व्हिडिओ पाठविणाऱ्या व कुटुंबीयांना जिवे मारण्याची धमकी देणाऱ्या तिघांना हडपसर पोलिसांनी अटक केली आहे.
अविराज चंद्रकांत कांबळे (वय २१), शाहीद दादूसाहब शेख (वय २२), तन्वीर अहमद बंकापूर (वय २१, सर्व रा. महात्मा फुले वसाहत, गाडीतळ, हडपसर) अशी अटक केलेल्यांची नावे आहेत. याप्रकरणी खडकी बाजारातील एका महिलेने फिर्याद दिली आहे. हा प्रकार हडपसर, तसेच खडकी बाजार येथे २० मे ते १७ सप्टेंबर २०२१ दरम्यान घडला आहे.
आरोपी अविराज कांबळे याने फिर्यादी यांच्या १३ वर्षांच्या मुलीचा पाठलाग करून तिला एकटे बघून तिचा विनयभंग केला. तिला मोबाईलवर मेसेज व फोन करून वारंवार कुटुंबीयांना जिवे मारण्याची तसेच स्वत:चा जीव देण्याची धमकी देऊन तिच्या मनात भीती निर्माण केली. फिर्यादी यांच्या मुलीला वारंवार कधी हडपसर, तर कधी खडकी येथे भेटायला बोलावून तिच्याशी अश्लील वर्तन केले. आरोपींनी संगनमताने गणपती दाखविण्याचा बहाणा करून खडकी येथील राहते घरातून हडपसर येथे पळवून नेले. शाहीद शेख याने तेथे तिच्याशी जवळीक साधण्याचा प्रयत्न केला. त्याचे व्हॉटसॲॅपवरून फिर्यादींच्या मुलीच्या मोबाईलवर अश्लील व्हिडिओ पाठवून तिच्या मनात लज्जा निर्माण केली. हडपसर पोलीस निरीक्षक शिंदे तपास करीत आहेत.