लोकमत न्यूज नेटवर्क
पुणे : पुणे, मुंबईसह संपूर्ण राज्यातच कोरोनाचा प्रादुर्भाव प्रचंड वेगाने वाढत आहे. यामुळेच शासनाने कडक निर्बंध लागू केले आहेत. परंतु, अद्यापही सर्वच मोठ्या शहरातील दुय्यम निबंधक कार्यालयांमध्ये विविध प्रकारचे दस्तनोंदणी करण्यासाठी प्रचंड गर्दी होत असल्याचे निदर्शनास आले आहे. राज्यातील लिव्ह अँड लायसन्स दस्तांची कार्यालयातील नोंदणी एप्रिल अखेरपर्यंत बंद केली आहे. तसेच नियमित दस्त नोंदणीसाठी देखील अनेक निर्बंध घालण्यात आले आहेत.
नोंदणी महानिरीक्षक यांनी काढलेल्या आदेशानुसार सद्यस्थितीत राज्यात कोरोना विषाणूचा प्रादर्भाव मोठ्या प्रमाणावर वाढलेला आहे. यासाठी राज्य शासनाच्या निर्देशाप्रमाणे कोरोना विषाणूचा प्रादुर्भाव रोखण्यासाठी विभागाने नागरिकांच्या सुरक्षिततेच्या दृष्टिने व दस्तनोंदणीच्या सोईसाठी विभागात काही ऑनलाईन सेवा उपलब्ध आहेत. या ऑनलाईन सेवांचा नागरिकांनी वापर करुन दुय्यम निबंधक कार्यालयातील गर्दी कमी करावी. याशिवाय काही सेवा व सुविधांचा वापर करण्याचे अनिवार्य केले आहे. त्याचा वापर करून दस्त नोंदणीसाठी यावे व शासनास सहकार्य करावे, असे आवाहन केले आहेत.
आता दस्त नोंदणीसाठी असतील हे निर्बंध
- नागरिकांनी या विभागाच्या संकेतस्थळावर असलेल्या दस्तनोंदणीकरता पीडीईद्वारे डाटा एंट्री करणे अनिवार्य केलेले आहे. यापुढे दुय्यम निबंधक कार्यालयातील डेटा एंट्री किंवा दुरुस्त्या पूर्णपणे थांबविण्यात येत आहेत. डाटा एंट्री करणे अनिवार्य केलेले आहे. यापुढे दुय्यम निबंधक कार्यालयातील डेटा एंट्री किंवा दुरुस्त्या पूर्णपणे थांबविण्यात येत आहेत.
- नागरिकांनी सदर पीडीई डेटा एंट्री करून दस्त नोंदणीसाठी या विभागाच्या वेबसाईट वर eStep-in या प्रणालीद्वारे दुय्यम निबंधक कार्यालयातील उपलब्ध असलेली सोईची वेळ ऑनलाईन आगाऊ बुक करून किंवा कार्यालयीन दूरध्वनीवर/ समक्ष संपर्क साधून वेळ आरक्षित करणे अनिवार्य केले आहे. कोणत्याही परिस्थितीत आगाऊ वेळ आरक्षीत केली नसल्यास (walking) दस्त नोंदणी होणार नाही याची कृपया नोंद घ्यावी.
- नागरिकांनी दस्ताचे निष्पादन घरी किंवा कार्यालयाच्या बाहेरच करावे व प्रत्येक व्यक्तीने सह्यांसाठी स्वतःचे पेन आणणे, एकच पेन एकमेकात सह्यांसाठी वापरू नये, आरक्षित वेळेलाच कार्यालयात हजर रहावे, मास्क लावल्या शिवाय कोणत्याही व्यक्तीला कार्यालयात प्रवेश दिला जाणार नाही.
- विभागाच्या वेबसाईट वर लिव्ह अँड लायसन ई-रजिस्ट्रेशन प्रणालीचा पर्याय उपलब्ध असल्याने लिव्ह अँड लायसन दस्ताची कार्यालयातील नोंदणी (फिजिकल रजिस्ट्रेशन) पुढील आदेशापर्यंत थांबवण्यात येत आहे.
- सद्यस्थितीत दस्त नोंदणीसाठी मोठ्या शहरात उदा.मुंबई ठाणे पुणे व इतर ठिकाणी सकाळ, दुपार दोन सत्रात कार्यालये सुरु आहेत. त्या ऐवजी अशा सर्व दुय्यम निबंधक कार्यालयाच्या कामकाजाची वेळ नियमित सत्रात म्हणजेच ९.४५ ते ६.१५ या वेळेत सुरू राहतील. याशिवाय जी दुय्यम निबंधक कार्यालय दस्त नोंदणीसाठी शनिवार व रविवार सुटीच्या दिवशी सुरु होते. त्याचे कामकाज शनिवार रविवारी बंद करण्यात येत असून त्या कार्यालयांचे कामकाज सोमवार ते शुक्रवार पाच दिवस नियमित सुरू राहील.