मार्केट यार्डातील शिवनेरी रस्ता १ जूनपर्यंत बंद

पुणे : कृषी उत्पन्न बाजार समितीच्या श्री छत्रपती शिवाजी मार्केट यार्डातील गर्दी रोखण्यासाठी शिवनेरी रस्ता (वखार महामंडळ चौक ते उत्सव हॉटेल) वाहतुकीस १ जूनपर्यंत बंद ठेवणार आहे. मार्केट यार्डात घाऊक खरेदीदारांना प्रवेश देणार आहे. केळी बाजाराच्या प्रवेशद्वारातून वाहनांना प्रवेश देणार असून, मुख्य प्रवेशद्वारातून वाहने उजवीकडे वळून वखार महामंडळ चौक तसेच डावीकडे वळून उत्सव हॉटेल चौकाकडे जातील. मार्केट यार्डातील गर्दी रोखण्यासाठी कृषी उत्पन्न बाजार समिती आणि पोलीस अधिकाऱ्यांची बैठक पार पडली होती. मार्केट यार्डात किरकोळ खरेदीदारांना प्रवेश नाकारला आहे. शेतीमाल वगळता अन्य वाहनांसाठी हा रस्ता बंद राहणार आहे. करोनाच्या संसर्गामुळे प्रशासनाने कठोर निर्बंधात वाढ केल्यानंतर पुढील आदेशापर्यंत शिवनेरी रस्ता बंद ठेवण्यात येणार असल्याचे वाहतूक शाखेचे पोलीस उपायुक्त राहुल श्रीरामे यांनी कळविले आहे.