नीलेश राऊत
लोकमत न्यूज नेटवर्क
पुणे : कोरोनाची दुसऱ्या लाटेने एप्रिल महिन्यात उच्चांक गाठला. पण मे महिन्याच्या दुसऱ्या आठवड्यापासून या लाटेला लागलेली ओहोटी कायम असल्याचे दिलासादायक चित्र आकडेवारीवरून स्पष्ट झाले आहे. ‘अमुकच रुग्णालय हवे,’ असा आग्रह नसेल तर कोरोनाबाधितांना रुग्णालयातील खाट (बेड) ही विनासायास मिळू लागली आहे. ऑक्सिजनचाही मुबलक पुरवठा असून सध्या २ हजार ८८४ ऑक्सिजन खाटा रिक्त आहेत.
एप्रिल महिन्यात रुग्णालयात खाट आणि त्यातही ऑक्सिजन खाटेसाठी वणवण करावी लागत होती. महापालिकेकडून २० मे रोजीच्या सायंकाळी सहापर्यंत मिळालेल्या आकडेवारीनुसार १३३ आयसीयू खाटा आणि २१ व्हेंटिलेटर खाटा उपलब्ध असल्याचे सांगण्यात आले. जम्बो हॉस्पिटलमध्येही सध्या ४०३ रुग्ण असून येथील उर्वरित सर्व ऑक्सिजन खाटा रिक्त आहेत.
कोरोनाबाधितांची दुसरी लाट प्रामुख्याने उपनगरांमध्ये, सोसायट्या आणि उच्चभ्रू वस्त्यांमध्ये आढळून आली. गेल्यावर्षी पहिल्या लाटेचा प्रकोप अनुभवलेल्या दाट लोकवस्तीच्या मध्यवर्ती पेठांमध्ये तसेच झोपडपट्टी भागात दुसऱ्या लाटेचा जोर कमी आहे. याचे उत्तम उदाहरण म्हणजे लोहियानगर-कासेवाडी हा भाग आहे. या परिसरात १ मे रोजी केवळ ९ कोरोनाबाधित आढळून आले. पुढे दिवसाकाठी ही संख्या कमी होत गेली. आता तर ती फक्त एकवर आली आहे.
रुग्णवाढीचा वेग अधिक असलेल्या औंध-बाणेर क्षेत्रीय कार्यालयाच्या हद्दीत एप्रिल महिन्यात १० हजार ८४४ कोरोना रुग्ण होते. पण मे महिन्याच्या वीस दिवसांत येथे केवळ ३ हजार २१४ रुग्ण आढळून आले आहेत. हीच परिस्थिती धनकवडी, सहकारनगर, हडपसर, मुंढवा येथे असून एप्रिल महिन्याच्या तुलनेत ७० टक्क्यांनी रुग्ण संख्या या भागातही कमी झाली आहे.
दरम्यान हडपसर, मुंढवा येथे कोरोनाच्या दुसऱ्या लाटेतले सर्वाधिक रुग्णवाढ दिसून आली. एप्रिल महिन्यात या एकाच क्षेत्रीय कार्यालयाच्या हद्दीत २१ हजार ८८० रुग्ण आढळून आले होते. मात्र मे महिन्यातल्या पहिल्या पंधरवड्यात या भागातली रुग्णसंख्याही झपाट्याने कमी झाली असून १ ते १६ मे दरम्यान फक्त ५ हजार ७७७ रुग्ण आढळून आले.
चौकट
शहरातील क्षेत्रीय कार्यालयनिहाय घटलेली रुग्णसंख्या
कार्यालयफेब्रवारी मार्च एप्रिल१ मे ते १६ मेपर्यंत
औंध-बाणेर ५६७ ५१७८ २९४३ २९४३
भवानी पेठ २४१ २१३२ ३०८५ ५१४
बिबवेवाडी ६४३ ४४३६ ७३९८ १४९५
धनकवडी/सहकारनगर ६५९ ५६८८ १२,७६६३५५८
ढोले पाटील रोड ३११ २६९२ ५२७२ १४७१
हडपसर / मुंढवा १००९ ८७५१ २१८८० ५७७७
कसबा पेठ विश्रामबाग ५७२ ४०८२ ७०४८ ११६१
कोंढवा-येवलेवाडी ३७० ३९१० ८२९४ १८९०
कोथरूड-बावधान ६५१ ४४७९ ११११६ ३५५५
नगररोड-वडगावशेरी ६९२ ७०६६ १५३७२ ४४९०
शिवाजीनगर-घोलेरोड २८८ २६९३ ६३३८ १२९७
सिंहगड रोड ६९२ ४८७४ १३,५८८३४६६
वानवडी-रामटेकडी २८७ २६९५ ६१५५ १२७८
वारजे-कर्वेनगर ७४२ ४६७९ १२५५७ ३३३२
येरवडा-धानोरी ३३८ ३२८६ ८४८२ २२४१
चौकट
शिस्तीला पर्याय नाही
“मे महिन्याच्या सुरुवातीपासूनची आकडेवारी पाहता सातत्याने ती घटताना दिसते. यातून कोरोनाची दुसरी लाट ओसरत असल्याचा निष्कर्ष नक्की काढता येईल. मात्र अशावेळी सर्वांनी खबरदारी घेणे आवश्यक आहे. शासनाने घालून दिलेल्या नियमांचे पालन करणे हे आपल्याला जरूरी आहे.”
-डॉ. संजीव वावरे, सहायक आरोग्य प्रमुख, पुणे मनपा
चौकट
अन्य जिल्ह्याचा ताण...
शहरातील रुग्णसंख्या वेगाने घसरत असल्याचे समाधानकारक चित्र असले तरी अन्य जिल्ह्यातून अथवा लगतच्या जिल्ह्यातून गंभीर रुग्ण उपचारासाठी येण्याचे प्रमाण जास्त आहे. आजमितीला शहरात साधारणत: ४० टक्के रुग्ण हे जिल्ह्यातील तथा बाहेरच्या जिल्ह्यातील आहेत. स्थानिक स्तरावर रुग्णांची प्रकृती गंभीर झाल्यावर त्याला पुण्यात आणण्याचे प्रमाण अधिक आहे. अशा अन्य जिल्ह्यांमधल्या, शहराबाहेरच्या गंभीर रुग्णांसाठी सध्या आयसीयू व व्हेंटिलेटर खाटा जास्त प्रमाणात लागत असल्याचे सूत्रांनी सप्ष्ट केले. त्यामुळे रुग्णसंख्या पंधरा हजारांच्या घरात आली असली तरी मृत्यूदर कायम आहे. शहरातील रोजच्या मृत्यूंमध्ये २५ टक्के मृत्यू पुण्याबाहेरील कोरोनाबाधितांचे आहेत.