सासवड : सासवड (ता. पुरंदर) येथे मंगळवारी (दि. २) रात्री किर्लोस्कर कंपनीच्या उत्तर बाजूला तार कंपाउंडनजीक अनोळखी स्त्रीचा शिर नसलेला मृतदेह सापडला. स्त्रीचे वय अंदाजे २० ते २५ वर्षे असून ,धारदार हत्याराने खून करून तिचे शिर नसलेले प्रेत पुरावा नाहीसा करण्याच्या दृष्टीने टाकून दिले असल्याचा पोलीस तपासात प्राथमिक अंदाज व्यक्त केला आहे.
स्त्रीच्या अंगामध्ये गुलाबी रंगाची सोनेरी झालरचे नक्षीकाम केलेली साडी असून अंगामध्ये त्याच रंगाचा नक्षीचा ब्लाऊज आढळून आला. मयताचे उजव्या हातामध्ये लाल रंगाचे नक्षीचे लाखी व काचेच्या बांगड्या असून अंगठ्याजवळील बोटांमध्ये पिवळ्या धातूची अंगठी व हाताचे पंजाचे मागील बाजूस मराठीमध्ये ‘बंतो खयाली’ असे गोंदलेले असून हातामध्ये बांगड्या आहेत. तपास सासवडचे पोलीस निरीक्षक एम. बी. पाटील हे करीत आहेत.