पुन्हा फडकला शिवसेनेचा भगवा

मावळ लोकसभा मतदारसंघात शिवसेनेचे श्रीरंग बारणे यांनी ५ लाख १२ हजार २२६ मते मिळवून विजय संपादन केला.

पिंपरी : मावळ लोकसभा मतदारसंघात शिवसेनेचे श्रीरंग बारणे यांनी ५ लाख १२ हजार २२६ मते मिळवून विजय संपादन केला. शेकापचे लक्ष्मण जगताप यांच्याशी चुरशीची लढत देऊन त्यांनी १ लाख ५७ हजार ३९७ हजारांचे मताधिक्य मिळविले. शेकापचे जगताप यांना दुसर्‍या क्रमांकाची ३ लाख ५४ हजार ८२९ मते मिळाली. तर १ लाख ८२ हजार २९३ मते मिळविलेले राष्ट्रवादी काँग्रेसचे राहुल नार्वेकर तिसर्‍या क्रमांकावर फेकले गेले. मोदी फॅक्टरच्या लाटेत शिवसेनेला मावळाचा गड अभेद्य ठेवण्यात यश मिळाले. पिंपरी चिंचवड महापालिकेत सत्ताधारी, पुणे जिल्ह्यावर प्राबल्य, पिंपरी, चिंचवड आणि भोसरी या तीन विधानसभा मतदारसंघात आमदार तरिही मावळ लोकसभेची जागा मात्र शिवसेनेच्या ताब्यात हे शल्य राष्टÑवादी काँग्रेसच्या नेत्यांना बोचत होते. ही खंत केंद्रिय कृषिमंत्री शरद पवार आणि उपमुख्यमंत्री अजित पवार यांनी अनेकदा ही खंत व्यक्त केली होती. ही जागा खेचून आणण्याचा चंग बांधला होता. गतनिवडणुकीत शिवसेनेला शेकापचा पाठिंबा होता, या वेळी शेकापने चिंचवडचे आमदार लक्ष्मण जगताप यांना उमेदवारी दिली असल्याने शेकापच्या उमेदवाराचेच शिवसेनेपुढे आव्हान होते. बारणे यांना उमेदवारी दिल्याने नाराज झालेल्या खासदार बाबर यांनी शिवसेनेला रामराम ठोकून मनसेत प्रवेश केला. मनसेच्या माध्यमातून पाठिंबा म्हणून शेकापचे जगताप यांना साथ दिली. जगताप यांना साथ देणारे एकटे बाबरच नव्हते, तर त्यांचे समर्थकसुद्धा प्रतिस्पर्धी उमेदवार जगताप यांच्याबरोबर होते. अनधिकृत बांधकामाचा प्रश्न सुटला नाही म्हणून जगताप यांनी राष्ट्रवादी काँग्रेसची उमेदवारी नाकारली. जगताप यांच्याऐवजी पर्यायी उमेदवार म्हणून राष्टÑवादी काँग्रेसने राहुल नार्वेकर यांना रिंगणात उतरवले होते. पनवेलमध्ये काँग्रेसचे आमदार प्रशांत ठाकूर, कर्जतमध्ये राष्टÑवादी काँग्रेसचे सुरेश लाड, उरणमध्ये शेकापचे विवेक पाटील अशी घाटाखालच्या विधानसभा मतदारसंघातील परिस्थिती, घाटाखाली शिवसेनेला मिळणारी शेकापची साथ यावेळी नव्हती, घाटावर मावळ या एकमेव विधानसभा मतदारसंघात भाजपचे बाळा भेगडे ही अपवादात्मक अनुकुलता वगळता प्रतिकूल परिस्थितीत बारणे यांनी शिवसेना,भाजप,आरपीआय, स्वाभिमानी शेतकरी संघटना या महायुतीच्या माध्यमातूल शर्थीची झुंज दिली. अनधिकृत बांधकामे नियमितीकरणाचा प्रश्न न सुटल्याने राष्टÑवादी कॉंग्रेस,काँग्रेसबद्दल पिंपरी चिंचवडवासीयांच्या मनात नाराजी होती.त्यात मोदी फॅक्टरची लाट यामुळे बारणे यांच्या बाजूने मतदारांनी कौल दिला. (प्रतिनिधी)