हेलिकॉप्टरमधून पत्रा पडून घराच्या छताचा भाग कोसळला

पुणे, दि.8 - आकाशातून जात असलेल्या हेलिकॉप्टरमधून निखळलेला पत्रा थेट एका घरावर पडून छताचा काही भाग पडल्याची घटना हडपसर येथील रामटेकडी झोपडपट्टीमध्ये घडली. घराच्या पत्र्यावर पडलेली ही वस्तू थेट पोटमाळ्यावर पडून छताला भोक पाडत सर्वात खालच्या खोलीत पडली. सुदैवाने या घटनेत कोणी जखमी झाले नाही. ही घटना मंगळवारी संध्याकाळी घडली. पोलिसांनी दिलेल्या माहितीनुसार, संध्याकाळी रामटेकडी झोपडपट्टीवरून एक हेलिकॉप्टर उडत जात होते. या हेलिकॉप्टरमधून हिरव्या रंगाची आणि अर्धगोलाकार आकाराची चपटी वस्तू खाली पडली. प्रचंड वेगात खाली आलेला पाच ते सहा किलोचा हा पत्रा एका घराच्या छताच्या पत्र्यावर पडला. पत्रा फाडून ही वस्तू पोटमाळ्याच्या स्लॅबवर आदळली. त्यामुळे स्लॅबला भगदाड पडले. या भगदाडामधून ही वस्तू थेट सर्वात खालच्या खोलीमध्ये जाऊन पडली. स्वयंपाक घर असलेल्या या खोलीत सुदैवाने कोणीही नव्हते. स्थानिकांनी लष्कराचे हेलिकॉप्टर असल्याचे पोलिसांना सांगितले आहे. हडपसर, मुंढवा याभगतील एमआयडीसी परिसरात बड्या कंपन्या आहेत. यासोबतच लष्कराचा मोठा भाग आहे. येथील काही उद्योजक हेलिकॉप्टरचा नेहमी वापर करतात. तसेच लष्कराच्या हेलिकॉप्टरचीही वर्दळ असते. त्यामुळे हे हेलिकॉप्टर नेमके कोणाचे होते याबाबत स्पष्टपणे सांगता येत नसल्याचे पोलिसांनी सांगितले आहे. पुढील तपास सुरू असून घराचे मात्र मोठे नुकसान झाले आहे.