लोकमत न्यूज नेटवर्क
पुणे : सध्या पुस्तक विक्री व्यवसाय हा अनंत अडचणींमधून जात आहे. त्यात पुस्तकांसाठी आवश्यक असणारा इंटरनॅशनल स्टँडर्ड बुक नंबर (आयएसबीएन) प्रकाशकांना मिळू शकत नसल्याने पुस्तक निर्मितीवर परिणाम होत आहे. पुस्तक नोंदणीसाठीचे जुने आणि नवीन पोर्टल काम करीत नसल्याने प्रकाशकांना आयएसबीएन क्रमांक मिळणे अवघड झाले आहे. तरी या प्रकरणात लक्ष घालून हा प्रश्न मार्गी लावावा अशा आशयाचे पत्र मराठी प्रकाशक परिषदेने केंद्राच्या राजा राममोहन रॉय नॅशनल एजन्सीच्या संचालकांना पाठविले आहे.
‘पुस्तके अडकली आयएसबीएन च्या चक्रात’ या मथळ्याखाली ‘लोकमत’मध्ये (दि.१६) प्रकाशकांना ‘इंटरनॅशनल स्टँडर्ड बुक नंबर’ हा केंद्राच्या राजा राममोहन रॉय नॅशनल एजन्सीच्या किचकट प्रक्रियेमुळे मिळणे अवघड झाले आहे, अशा आशयाचे वृत्त प्रसिद्ध झाले होते. लॉकडाऊनच्या काळात नूतनीकरणामुळे हे संकेतस्थळ काही महिने बंद होते आणि आता जरी ते पूर्ववत सुरू केले असले, तरी ही प्रक्रिया पूर्ण करूनही आयएसबीएन क्रमांक मिळत नसल्यामुळे पुस्तके छापू शकत नाहीत याकडे प्रकाशकांनी लक्ष वेधले आहे.
नवीन पुस्तकांसाठी आयएसबीएन क्रमांक मिळू शकत नसल्याबददल प्रकाशकांच्या अनेक तक्रारी संस्थेकडे प्राप्त झाल्या आहेत. एजन्सीच्या नवीन पोर्टल वर लॉगिन केल्यानंतर सर्व प्रक्रिया पूर्ण करून देखील व्हेरिफिकेशनसाठी कोणताही मेल प्रकाशकांना पाठविला जात नाही. तरी राजा राममोहन रॉय नॅशनल एजन्सीने लक्ष घालून ही प्रक्रिया सुरळित सुरू करण्याची मागणी मराठी प्रकाशक परिषदेने केली आहे.