उरुळी कांचन : उरुळी कांचन परिसरातील एका खाजगी रुग्णालयाच्या प्रशासनाने बिलासाठी एका ५५ वर्षीय कोरोनाबाधित मृताचा मृतदेह तब्बल पाच तासांहून अधिक काळ अडवून ठेवल्याचा धक्कादायक प्रकार उघडकीस आला आहे. एका राजकीय नेत्याच्या हमीनंतर रुग्णालय प्रशासनाने मृतदेह नातेवाईकांच्या हवाली केला असला, तरी यानिमित्ताने पूर्व हवेलीमधील खाजगी रुग्णालयांची मनमानी व अडवणूक यानिमित्ताने पुढे आली आहे.
पुणे-सोलापूर महामार्गालगतच्या एका छोट्या ग्रामपंचायतीच्या कार्यालयात शिपाई म्हणून काम करणाऱ्या कर्मचाऱ्याचे ५५ वर्षीय वडील कोरोनाबाधित झाल्याने, मागील पंधरा दिवसांपासून उरुळी कांचनमधील एका खाजगी रुग्णालयात उपचार घेत होते. रुग्णालय प्रशासनाने या पंधरा दिवसांच्या काळात संबंधित रुग्णांच्या नातेवाईकाकडून पाच लाख रुपये अनामत रक्कम भरुन घेतली होती. मात्र, वरील रुग्ण गुरुवारी (दि. १५) सायकांळी पाच वाजण्याच्या सुमारास दगावला. या वेळी रुग्णालय प्रशासनाने संबधित रुग्णाचे पंधरा दिवसांचे सहा लाख वीस हजार रुपयांचे बिल मृताच्या नातेवाईकांच्या हातावर ठेवले.
दरम्यान, सहा लाख वीस हजारपैकी मृतांच्या नातेवाईकांनी पाच लाख रुपये अगोदरच भरले होते. मात्र मृताच्या नातेवाईकांची आर्थिक परिस्थिती हलाखीची असल्याने मृताच्या नातेवाईकांनी रुग्णालय प्रशासनाकडे बिलात सवलत देण्याची मागणी केली. मात्र बिलात सवलत देण्यास रुग्णालयाने ठाम नकार देत संपूर्ण बिल भरल्याशि्वाय मृतदेह ताब्यात देणार नसल्याचे नातेवाईकांना सांगितले. यावर मृताच्या मुलाने बिल भरण्यास थोडीफार मुदत देण्याची मागणी केली. या मागणीसपण रुग्णालय प्रशासनाने नकार दिला. अखेर सहा तासांनंतर एका सहकारातील ज्येष्ठ राजकीय नेत्याने उर्वरित बिल भरण्याची हमी घेतल्यावर, रुग्णालय प्रशासनाने मृत व्यक्तीचा मृतदेह संबंधित व्यक्तीच्या मुलाच्या ताब्यात दिला. मृतांच्या नातेवाईकांनी पैशासाठी मृतदेह अडवून ठेवल्याचा आरोप खाजगी रुग्णालय प्रशासनावर केला असला तरी, रुग्णालय प्रशासनाने मात्र वरील आरोप फेटाळून लावला आहे.
खाजगी रुग्णालयांकडून अव्वाच्या सव्वा बिल आकारणी...
पूर्व हवेलीमधील अनेक खाजगी रुग्णालये कोविड रुग्णांच्याकडून अव्वाच्या सव्वा बिल आकारणी करत असल्याचा तक्रारी आरोग्य विभागाकडे येऊ लागल्या आहेत. कोरोनाबाधित रुग्णांकडून पूर्व हवेलीमधील अनेक खाजगी रुग्णालये पन्नास हजार ते सहा लाखांपर्यंत बिल आकारत असल्याच्या तक्रारी सुरु झाल्या आहेत. मोठ्या रुग्णालयाच्या तुलनेत सुविधा कमी असतांनाही, छोट्या रुग्णालयात बिल मात्र अव्वाच्या सव्वा येत असल्याचा आरोप जिल्हा नियोजन समितीचे सदस्य संतोष कांचन यांनी केला आहे. कोरोनाच्या पहिल्या लाटेप्रमाणे याही वेळी खाजगी रुग्णालयांच्या सरसकट बिलांचे ऑडिट करण्याची मागणी जिल्हा कांचन यांनी जिल्हाधिकारी कार्यालय व आरोग्य विभागाकडे केली आहे. याबाबत बोलतांना हवेली पंचायत समितीचे आरोग्य अधिकारी डॉ. सचिन खरात म्हणाले की बिलाबाबतच्या तक्रारीच्या अनुषंगाने बिलांचे ऑडिट करणार असून हवेली तालुक्यातील अनेक खाजगी रुग्णालये बिल आकारणी जादा दराने व चुकीची पध्दत वापरुन करीत असल्याच्या अनेक तक्रारी आलेल्या आहेत. पन्नास हजारापासून कित्येक लाखात बिले येत असल्याच्या तक्रारी आलेल्या आहेत. खाजगी रुग्णालयांनी शासकीय दरानुसारच बिल आकारणी करण्याचे आदेश शासनाने दिलेले आहेत. ऑडिटमध्ये बिल चुकीचे आढळल्यास, रुग्णांच्या नातेवाईकांना बिलातील फरक परत देण्याबरोबरच, रुग्णालयाची नोंदणी रद्द कऱण्याची कारवाई ही शासनाच्या वतीने करण्यात येणार आहे.