पिंपळझापला बिबट्या पिंजऱ्यात जेरबंद

येथील गारमळा पिंपळझाप शिवारात एक नर जातीचा बिबट्या वनखात्याने लावलेल्या पिंजऱ्यात शुक्रवारी पहाटेच्या जेरबंद झाला.

बेल्हा : येथील गारमळा पिंपळझाप शिवारात एक नर जातीचा बिबट्या वनखात्याने लावलेल्या पिंजऱ्यात शुक्रवारी पहाटेच्या जेरबंद झाला. येथील शिंदेमळा, गारमळा व पिंपळझाप परिसरात गेल्या काही दिवसांपासून बिबट्या ग्रामस्थांना दिसत होता. तसेच पाळीव जनावरांवरही हल्ले सुरूच होते. गारमळा पिंपळझाप शिवारातील विजय घोडके यांच्या उसाच्या शेतात गट नं. २८ मध्ये वनखात्याने गेल्या ८ दिवसांपूर्वीच पिंजरा लावला होता. हा बिबट्या येथील लोकांना दिवसा रात्री कधीही दिसत होता. त्यामुळे लोकांमध्ये भीतीचे वातावरण होते. ग्रामस्थ रस्त्याने जाताना-येताना बिबट्याच्या भीतीने वावरत होते. यामुळे या ठिकाणी वनविभागाने पिंजरा लावला होता. त्यात हा बिबट्या सकाळच्या सुमारास जेरबंद झाला. वनपाल जे. टी. भंडलकर व बजरंग केंद्रे पाहणीसाठी गेले असता त्यांना पिंजऱ्यांचे दार खाली पडलेले दिसले. त्यांनी पाहिले असता बिबट्या पिंजऱ्यात जेरबंद झाला आहे. वनपाल बजरंग केंद्रे व वनरक्षक जे. टी. भंडलकर यांनी पकडलेल्या बिबट्याला माणिकडोह निवारा केंद्रात हलविण्यात आले असल्याचे सांगितले. या ठिकाणी लगेचच दुसरा पिंजरा लावण्यात येणार असल्याचे त्यांनी सांगितले. (वार्ताहर)