पुणे : रब्बी हंगामातील पिकांसाठीही एक रुपयात पीक विमा उपलब्ध करून दिला आहे. पीक विमा काढण्यासाठी १५ डिसेंबरची अंतिम मुदत असून, राज्यात आतापर्यंत १८ लाख ७९ हजार ८२२ अर्ज आले आहेत. यातून १३ लाख ३७ हजार ३३६ हेक्टरवरील पिकांचे क्षेत्र तर सुमारे साडेपाच हजार कोटींची रक्कम विमा संरक्षित झाली आहे.
परभणी जिल्ह्यातून सर्वाधिक २ लाख ७४ हजार अर्ज आले आहेत. पुणे विभागातून २ लाख ४२ हजार ५९७ तर ठाणे व पालघर जिल्ह्यातून एकही अर्ज आला नसल्याचे कृषी विभागाने दिलेल्या आकडेवारीवरून स्पष्ट झाले आहे.
शेतकऱ्यांना ज्वारी, गहू, हरभरा, रब्बी कांदा या पिकांसाठी १५ डिसेंबरपर्यंत अर्ज करता येतील. तसेच उन्हाळी भात व उन्हाळी भुईमूग या पिकासाठी ३१ मार्च २०२५ पर्यंत शेतकऱ्यांना सहभागी होता येईल. यंदा अतिवृष्टीमुळे खरिपातील पिकांना मोठा फटका बसला आहे. त्यामुळे शेतकऱ्यांची भिस्त आता रब्बी पिकांवर आहे. त्यामुळे गेल्या वर्षाच्या तुलनेत यंदा विमा संरक्षित क्षेत्रात किमान १० टक्क्यांची वाढ अपेक्षित आहे.
ठाणे व पालघर जिल्ह्यातून एकही अर्ज अद्याप आलेला नाही. रायगडमधून एक, रत्नागिरीमधून पाच तर सिंधुदुर्गमधून सहा अर्ज आले आहेत.
विभागनिहाय अर्जांची संख्या
कोकण १२
नाशिक १,२२,७७६
पुणे २,४२,५९७
कोल्हापूर ५३,४०४
छ. संभाजीनगर ४,४५,९०३
लातूर ७,२२,१७९
अमरावती २,५८,७०६
नागपूर ३४,२४५
एकूण १८,७९,८२२
लातूरमधून सर्वाधिक
लातूर विभागातून सर्वाधिक ७ लाख २२ हजार ११९ अर्ज आले आहेत.
एकूण अर्जांमुळे राज्याला ३६ कोटी तर केंद्र सरकारला २१८ कोटी रुपयांचा प्रीमियम विमा कंपन्यांना द्यावा लागणार आहे.
राज्यात गेल्यावर्षी रब्बी हंगामात एकूण ७१ लाख ८७ हजार १८२ अर्ज आले होते.