पुणे : ‘कोरोनामुळे लागलेल्या टाळेबंदीने लावणीचे कार्यक्रम पूर्णपणे बंद झाले आणि मोठे आर्थिक नुकसान सोसावे लागले. आता नाट्यगृहांमध्ये लावणीचे कार्यक्रम करायला परवानगी मिळाली आहे. त्याचप्रमाणे, यात्रा, जत्रांमध्ये खुल्या मैदानावरील लावणी महोत्सवांना परवानगी मिळावी,’ अशी अपेक्षा लावणी कलाकारांनी व्यक्त केली.
पठ्ठे बापूराव प्रतिष्ठान आणि सांस्कृतिक कला मंडळातर्फे २ जानेवारी रोजी ‘अहो नादच खुळा’ हा कार्यक्रम सादर होणार आहे. यानिमित्ताने तब्बल दहा महिन्यांनी लावणी कलावंतांसाठी रंगमंचाचा पडदा उघडणार आहे. या पार्श्वभूमीवर लावणी लोककला निर्माता संघाचे उपाध्यक्ष शशिकांत कोठावळे, लावणीसम्राज्ञी माया खुटेगावकर, कलाकार संगीता लाखे आणि अर्चना जावळेकर यांनी ‘लोकमत’ कार्यालयाला भेट दिली. त्या वेळी त्यांनी लावणी कलावंतांच्या समस्या, पुढील कार्यक्रमांचे नियोजन अशा विविध मुद्द्यांना स्पर्श केला.
खुटेगावकर म्हणाल्या, ‘जत्रा, यात्रांमध्ये लावणीच्या कार्यक्रमांना रसिकांचा चांगला प्रतिसाद मिळतो. मात्र, अद्याप त्या कार्यक्रमांना शासनाने परवानगी दिलेली नाही. ती परवानगी मिळाल्यास कार्यक्रम वाढू शकतील. कलाकारांचा उदरनिर्वाह होऊ शकेल.’ सध्या प्रेक्षकांची अभिरुची बदलली आहे, याकडे त्यांनी लक्ष वेधले. त्या म्हणाल्या, ‘प्रेक्षकांना कार्यक्रमात वैविध्य हवे असते. त्यामध्ये काही लावण्या, काही हिंदी गाणी असे बदल प्रेक्षकांच्या आवडीनुसार केले जातात. शासनाकडून लावणी कलावंतांना मानधनही मिळावे, अशी अपेक्षा आहे.’
---
सध्या नाट्यगृहांना परवानगी मिळाली असली तरी ५० टक्के प्रेक्षकच कार्यक्रमाला उपस्थित राहू शकतात. लावणीसारख्या लाईव्ह कार्यक्रमांना प्रेक्षकांना मागे बसणे रुचत नाही. आम्ही हॉटेलमध्ये एकत्र जातो, गाडीतून एकत्र प्रवास करतो, मग नाट्यगृहांमध्येच शेजारी का बसू शकत नाही, असा सवाल उपस्थित केला जातो.
- शशिकांत कोठावळे