लोकमत न्यूज नेटवर्क
पुणे : खेड पंचायत समितीच्या सदस्यांसह त्यांच्या कुटुंबीयांवर जीवघेणा हल्ला करीत गोळीबार करणा-या सभापतीला त्याच्या एका साथीदारासह ग्रामीण पोलिसांच्या स्थानिक गुन्हे शाखेने अटक केली, तर अन्य संशयित आरोपींचा पोलिसांकडून कसून शोध सुरू आहे. अविश्वासाचा ठराव झाल्याने सभापतीने हे कृत्य केले.
सभापती भगवान नारायण पोखरकर व केशव अरगडे अशी अटक केलेल्या संशयित आरोपींची नावे आहेत. याप्रकरणी प्रसाद दशरथ काळे (रा. गोलेगाव, खेड) यांनी हवेली पोलीस ठाण्यात फिर्याद दिली होती. त्यावरून भगवान पोखरकर, जालिंदर नारायण पोखरकर, केशव आरगडे यांच्यासह 15 ते 20 जणांविरुद्ध खुनाचा प्रयत्न, बेकायदा शस्त्र बाळगून गोळीबार करणे, विनयभंग, अपहरण, हॉटेलमध्ये जबरदस्तीने घुसून तोडफोड करणे या स्वरुपाचा गुन्हा दाखल झाला होता.
भगवान पोखरकर खेड पंचायत समितीचा विद्यमान सभापती आहे. सभापती पदाचा कार्यकाळ संपूनही अद्याप पदभार न सोडलेल्या पोखरकर याच्याविरुद्ध शिवसेना व मित्र पक्षांच्या सदस्यांनी मिळून जिल्हाधिकाऱ्यांकडे अविश्वास ठराव दाखल केला होता. त्याबाबतची सुनावणी ३१ मे रोजी होणार आहे. या पार्श्वभूमीवर शिवसेनेचे सहा, राष्ट्रवादी कॉंग्रेसचे चार व भारतीय जनता पक्षाचा एक असे अकरा सदस्य त्यांच्या परिवारासह २६ मे रोजी डोणजे परिसरातील एका हॉटेलमध्ये वास्तव्यास होते. त्यावेळी भगवान पोखरकर व त्याच्या १५ ते २० साथीदारांनी गुरूवारी पहाटे पाच वाजण्याच्या सुमारास सदस्य व त्यांच्या कुटुंबीयांवर जीवघेणा हल्ला केला. तर पोखरकरचा भाऊ जालिंदर पोखरकर याने पिस्तुलने हवेत गोळीबार करीत दहशत निर्माण केली होती.
या घटनेनंतर व हवेली पोलीस व स्थानिक गुन्हे शाखेच्या पोलिसांकडून समांतर तपास सुरू होता. दरम्यान, सभापती भगवान पोखरकर व केशव अरगडे हे दोघेही शिवाजीनगर येथील मंगला चित्रपटगृहाजवळ येणार असल्याची खबर पोलिसांना मिळाली. त्यानंतर पोलिस निरीक्षक पद्माकर घनवट, पोलिस उपनिरीक्षक रामेश्वर धोंडगे, पोलिस कर्मचारी सचिन गायकवाड, गुरू जाधव, अमोल शेडगे आदीच्या पथकाने मंगला चित्रपटगृहाजवळ सापळा रचून दोघांना अटक केली.
-----------