लोकमत न्यूज नेटवर्क
पुणे : राज्यात प्रवासावर पुन्हा एकदा निर्बंध आणण्यात आले असून, इतर जिल्ह्यात जाण्यासाठी आता ई-पास लागणार आहे. पुणे पोलीस आयुक्तालयात ई-पाससाठी डिजिटल कक्ष स्थापन करण्यात आला आहे.
राज्यात कोरोनाचा प्रादुर्भाव वाढत असल्याने शासनाने ‘ब्रेक दि चेन’अंतर्गत असणारे निर्बंध अधिक कडक केले असून, प्रवासावरदेखील कठोर निर्बंध लावण्यात आले आहेत. हे नियम १ मे पर्यंत लागू आहेत. या दरम्यान राज्यातील जनतेची गैरसोय होऊ नये याकरिता ई-पास यंत्रणा सुरू करण्यात आली आहे. एका जिल्हयातून दुसऱ्या जिल्ह्यात तसेच पुणे शहरातून इतर जिल्ह्यात जाण्याकरिता ँ३३स्र२://ूङ्म५्र1ि9.ेँस्रङ्म’्रूी या संकेतस्थळावर ‘ई-पास’ची सुविधा उपलब्ध करून देण्यात आली आहे.
पुण्यातील पोलीस आयुक्त कार्यालयात पहिल्याच दिवशी सायंकाळी ६ वाजेपर्यंत २०७७ इतके विनंती अर्ज ई-पाससाठी कक्षाकडे प्राप्त झाले असून. त्यापैकी २८६ नागरिकांना डिजिटल पास देण्यात आले आहेत. ३७५ नागरिकांची आवश्यक कागदपत्रे नसल्याने नाकारण्यात आले आहेत.
या डिजिटल कक्षामध्ये १ पोलीस निरीक्षक, २ सहाय्यक पोलीस निरीक्षक, २ पोलीस उपनिरीक्षक आणि २० पोलीस अंमलदार यांची नेमणूक करण्यात आली आहे. नागरिकांना काही महत्त्वाच्या कारणांसाठी प्रवास करण्याची गरज निर्माण झाल्यास नागरिकांनी ई-पासचा वापर करावा, असे आवाहन राज्यातील पोलीस विभागाकडून करण्यात आले आहे.
जाणून घ्या कसा काढावा ई-पास
* ई- पास मिळवण्यासाठी सर्वप्रथम ँ३३स्र२://ूङ्म५्र1ि9.ेँस्रङ्म’्रूी या संकेतस्थळाला भेट द्या.
* ंस्रस्र’८ ाङ्म१ स्रं२२ ँी१ीह्ण या पयार्यावर क्लिक करा.
* ज्या जिल्ह्यात प्रवास करायचा आहे, तो जिल्हा निवडावा.
* आवश्यक कागदपत्र जोडावीत.
* प्रवास करण्यासाठीचे अत्यावश्यक कारणही तेथे नमूद करावे लागेल.
* कागदपत्रे अपलोड करताना सर्व माहिती तपशील एकाच डॉक्युमेंटमध्ये घेऊन तो अपलोड करावा.
* अर्ज केल्यानंतर तुम्हाला एक टोकन आयडी देण्यात येईल. तो सेव्ह करावा, त्यावरून अर्ज नेमका कोणत्या प्रक्रियेत आहे हे तुम्ही जाणू शकता. थोडक्यात या माध्यमातून तुम्हाला अर्जाचे स्टेटस तपासता येईल.
* पडताळणी आणि आवश्यक विभागांची परवानगी मिळाल्यानंतर तुम्ही तोच टोकन आयडी वापरून इ- पास डाऊनलोड करू शकता.
*ई-पासमध्ये तुमची माहिती, वाहनाचा क्रमांक, पासची वैधता कालावधी आणि क्यूआर कोड असेल.
* प्रवास करतेवेळी पासची मूळ प्रत आणि त्याची सॉफ्ट कॉपीही सोबत ठेवा. जेणेकरून पोलिसांनी विचारल्यानंतर पास दाखविता येऊ शकेल.
----------------------------------------------
कुणाला मिळू शकतो ई-पास
* अतिशय जवळच्या व्यक्तीचा विवाहसोहळा, एखाद्या व्यक्तीचा अंत्यविधी आणि अत्यावश्यक आरोग्य आणीबाणी या कारणांसाठी ई-पास मिळवता येऊ शकतो.
-अत्यावश्यक सेवांतील कर्मचाऱ्यांसाठी आंतरराज्यीय आणि जिल्हांतर्गत प्रवासासाठी ई-पासची आवश्यकता नाही.
व्यावसायिक कारणांसाठी परवानगी देण्यात येणार नाही.
विमान प्रवास करणाऱ्या नागरिकांना प्रवास करण्याकरिता डिजिटल पास देण्यात येईल.
* ज्यांना ऑनलाईन सेवेसाठीचा अ‍ॅक्सेस मिळत नाही, अशा व्यक्तींनी सदर प्रक्रियेसाठी नजीकच्या पोलीस स्थानकाला भेट द्यावी. जिथे त्यांची मदत केली जाईल.