पुणे : स्वत:च्याच १३ वर्षीय मुलीशी अश्लील चाळे करणाऱ्या ४६ वर्षीय बापाला न्यायालयाने पाच वर्षे सक्तमजुरी आणि तीन हजार रुपये दंडाची शिक्षा सुनावली. विशेष न्यायाधीश जी. पी. आगरवाल यांनी हा निकाल दिला.
संबंधित मुलीच्या आईनेच याबाबत कोथरूड पोलीस ठाण्यात फिर्याद दिली होती. १४ जून २०१४ आणि त्यापूर्वीच्या तीन महिन्यांच्या कालावधीत ही घटना घडली. या खटल्याचे कामकाज सरकारी पक्षातर्फे अतिरिक्त सरकारी वकील सुनील मोरे यांनी पाहिले. त्यांनी तीन साक्षीदार तपासले. फिर्यादी या कोथरूड परिसरात त्यांचा पती, दोन मुली आणि मुलासह राहातात. त्यातील सर्वात लहान मुलीवर अत्याचार झाले आहेत. फिर्यादी या घरकाम करतात. रात्रीच्या वेळी आणि पत्नी घरी नसल्याचा फायदा घेत तो मुलीसोबत अश्लील चाळे करीत. फिर्यादीला तीन महिन्यांपासून वडिलांचा मुलीसोबत वागण्यातील वेगळेपणा जाणवला. त्यावेळी विश्वासात घेऊन तिने पीडितेला याबाबत विचारणा केली. यावेळी घडलेला प्रकार समोर आला. त्यावेळी फिर्यादी यांनी एका स्वयंसेवी संस्थेच्या मदतीने पोलिसात फिर्याद दिली. दंड न भरल्यास एक महिना अतिरिक्त कारावास भोगावा लागेल, असे न्यायालयाने आदेशात म्हटले आहे.