लोकमत न्यूज नेटवर्क
पुणे : पंजाबपासून दक्षिण अरबी समुद्रापर्यंत निर्माण झालेल्या द्रोणीय स्थितीचा आता अधिक परिणाम जाणवू लागला आहे. पुढील तीन दिवस कोकण, गोवा, मध्य महाराष्ट्र व मराठवाड्यात मेघगर्जनेसह पावसाची शक्यता असल्याचा इशारा हवामान विभागाने दिला आहे. राज्यात सर्वात कमी किमान तापमान महाबळेश्वर येथे १५.७ अंश सेल्सिअस नोंद झाली आहे.
गेल्या २४ तासांत कोकण, गोवा, मध्य महाराष्ट्र व विदर्भात तुरळक ठिकाणी पाऊस पडला. मराठवाड्यात हवामान कोरडे होते.
मध्य महाराष्ट्र व मराठवाड्याच्या बहुतांश भागात तर विदर्भाच्या तुरळक ठिकाणी किमान तापमानात सरासरीच्या तुलनेत उल्लेखनीय वाढ झाली आहे.
७, ८ व ९ जानेवारी रोजी रत्नागिरी, सिंधुदुर्ग, अहमदनगर, पुणे, कोल्हापूर, सातारा, सांगली जिल्ह्यात मेघगर्जनेसह विजांचा कडकडाट होण्याची शक्यता आहे.
७ जानेवारी रोजी परभणी, नांदेड, लातूर, उस्मानाबाद जिल्ह्यात मेघगर्जनेसह पावसाची शक्यता आहे. औरंगाबाद येथे हलक्या पावसाची शक्यता आहे.
८ जानेवारी रोजी नाशिक, धुळे, औरंगाबाद, जालना, बीड जिल्ह्यात विजांच्या कडकडाटासह पावसाची शक्यता आहे. याशिवाय कोकण, मध्य महाराष्ट्रातील अनेक जिल्ह्यात हलक्या पावसाची शक्यता आहे. विदर्भात तुरळक ठिकाणी पावसाची शक्यता आहे.
९ जानेवारी रोजी कोकण, गोवा, मध्य महाराष्ट्रातील बहुतांश जिल्ह्यात तुरळक ठिकाणी हलक्या पावसाची आहे. मराठवाडा व विदर्भात हवामान कोरडे राहण्याची शक्यता आहे.