पुण्यातील नऱ्हे आंबेगावात २ फ्लॅटमधून मिळाली कागदपत्रे
लोकमत न्यूज नेटवर्क
पुणे : गुंतवणूकदारांची फसवणूक केल्याप्रकरणात समृद्ध जीवन फूड्स आणि समृद्ध जीवन मल्टीस्टेट मल्टीपर्पज कंपनीवर देशभरात अनेक गुन्हे दाखल आहेत. त्याचा तपास राज्य गुन्हे अन्वेषण (सीआयडी) करीत आहेत. सीआयडीच्या तपास पथकाला नऱ्हे आंबेगाव येथील २ फ्लॅटमध्ये मोठ्या प्रमाणावर कागदपत्रे सापडली असून, त्यातून कंपनीची आणखी काही मालमत्ता समोर आली आहे. गुरुवारी सकाळपासून सीआयडीचे १२ जणांचे पथक ही कागदपत्रे छाननी करण्याचे काम करीत असून, ते उद्याही सुरू राहणार आहे.
सीआयडीच्या उपविभागीय पोलीस अधिकारी मनीषा पाटील यांच्या नेतृत्वाखाली समृद्ध जीवनचा तपास करण्यात येत आहे. या गुन्ह्यात एकूण २५ आरोपी असून त्यापैकी सीआयडीने महेश मोतेवार याच्यासह १७ जणांना अटक केली आहे. समृद्ध जीवनची काही कागदपत्रे हलविली जात असल्याची माहिती सीआयडीच्या या पथकाला मिळाली. त्यानुसार पोलिसांनी संबंधितांवर पाळत ठेवून ते कोठे जात आहेत, त्यांचा पाठलाग केला. नऱ्हे आंबेगाव येथील एका इमारतीत ते गेले. या इमारतीतील दोन फ्लॅटमध्ये ही कागदपत्रे ठेवण्यात आली होती. तसेच एका दुकानातही काही कागदपत्रे ठेवली असल्याचे आढळून आले.
मनीषा पाटील, ३ पोलीस निरीक्षकांसह १२ जणांचे पथक आज दिवसभर या कागदपत्रांची पडताळणी करीत होते. ‘समृद्ध जीवन’ने देशभरात कोठे कोठे मालमत्ता खरेदी केली. कोठे जमीन आहे यासंबंधित ही कागदपत्रे आहेत.
महेश मोतेवार यांनी ‘समृद्ध जीवन’मार्फत गुंतवणूकदारांची आतापर्यंत साडेतीन हजार कोटींची फसवणूक केल्याचे समोर आले आहे. त्यापैकी त्याच्या अनेक मालमत्ता जप्त करण्यात आल्या आहेत. या कागदपत्रांमधून ‘समृद्ध जीवन’ची आतापर्यंत ज्ञात नसलेली मालमत्ता समोर आली आहे. ती जप्त करण्यासाठी ही कागदपत्रे सीआयडीला उपयुक्त ठरणार आहेत.