पुणे : पुणे ग्रामीण पोलीस क्षेत्रातील लोणीकंद आणि लोणी काळभोर ही दोन पोलीस ठाणी पुणे शहर पोलीस आयुक्तालयात समाविष्ट करण्याची अधिसूचना आज शासनाच्या वतीने काढण्यात आली आहे. येत्या २ ते ३ दिवसात पुणे पोलीस आयुक्तालयात त्यांचा समावेश केला जाईल, असे पोलीस आयुक्त अमिताभ गुप्ता यांनी सांगितले.
यापूर्वी २६ ऑक्टोंबर २०२० रोजी शासनाने अधिसूचना जारी करुन ही दोन्ही पोलीस ठाणी शहर पोलीस दलात समाविष्ट केली होती. मात्र, त्यावेळी त्याची अंमलबजावणी करण्यात आली नाही. उपमुख्यमंत्री अजित पवार यांच्या अध्यक्षतेखाली ४ जानेवारी रोजी झालेल्या बैठकीत ही दोन पोलीस ठाणी पुणे शहर पोलीस आयुक्तालयात समाविष्ट करण्याचा समावेश करण्याचा निर्णय घेण्यात आला. त्यानुसार लोणीकंद आणि लोणी काळभोर पोलीस ठाणी मनुष्यबळासह पुणे शहरात समाविष्ट करण्याची अधिसूचना आज जारी करण्यात आली. लोणी काळभोर पोलीस ठाण्यातील काही भागाचा मिळून उरळी कांचन पोलीस ठाणे हे नवीन पोलीस ठाणे ग्रामीण पोलीस दलात निर्माण करण्यात येणार आहे.